Тошкент шаҳри Мирзо Улуғбек туманида 22 ёшли талаба йигит ва 18 ёшли қиз ижарада яшайдиган хонадонда нарколаборатория ташкил этгани аниқланди, дея хабар бермоқда Ички ишлар вазирлиги.
Қайд этилишича, улар 2025 йилнинг сентябрь ойидан буён Telegram`даги наркодўконда кураторлар топшириқларига асосан прекурсорларни (тақиқланган моддаларни синтез қилиш учун ишлатиладиган асосий компонентлар) ташкил қилиш ва синтетик гиёҳвандлик воситаларини тайёрлаш билан шуғулланиб келган.
Мазкур манзилдан 1 кг мефедрон синтетик гиёҳвандлик воситалари ҳамда нарколабораторияда фойдаланиш учун зарур бўлган асбоб ва ускуналар далилий ашёлар тариқасида ҳужжатлаштириб олинган.
Тезкор тадбирда қўлга олинган кимёгар талаба йигитнинг мобиль телефонига келган геолокация бўйича йўналиш ташкил қилиниб, Янгиҳаёт туманидаги дала майдонида «закладка» усулида кўмиб кетилган 1 кг синтетик гиёҳвандлик воситалари топилган.
Пойтахт ҳудудида давом эттирилган тезкор қидирув тадбирларида ушбу воситаларни геолокацияларга «закладка» усулида тарқатиб келган 9 нафар закладчик гиёҳвандлик воситаларини олган вақтида ушланган. Улардан уч нафари пойтахтдаги олий таълим муассасалари талабалари бўлиб, худди шундай закладчик лавозимида ишлаб келган яна 6 нафар шахс қўлга олинган.
Улар орасида бу иш билан оилавий шуғулланиб келган фуқаролар ҳам бор, дейилади хабарда.
Мазкур ҳолат юзасидан ушбу жиноий гуруҳнинг аъзоларига нисбатан Жиноят кодексининг 273-моддаси 3-қисми «б» банди (Уюшган гуруҳ томонидан гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилган.
ИИВга кўра, республика бўйлаб ўтган тезкор тадбирлар натижасида жами 10 минг дозага тенг бўлган 2 кг синтетик гиёҳвандлик воситаларининг тарқалиши олди олинган.
