Тошкент халқаро аэропортида умумий қиймати 2,28 млрд сўмга тенг бўлган заргарлик буюмларининг ноқонуний олиб ўтилишига чек қўйилди, дея хабар бермоқда Божхона қўмитаси.
Дастлабки ҳолатда қўшни мамлакатга учаётган фуқаронинг юки рентген текширувидан ўтказилганда жомадон темир асосига ёпиштирилган сариқ рангли металлдан ясалган лента буюмлар аниқланган. Уларнинг оғирлиги 350 граммни, қиймати эса 549 млн сўмни ташкил қилади.
Яна бир ҳолатда хориждан учиб келиб, «яшил йўлак» орқали ҳаракатланган шахс текширилганда, у ички кийими ва пайпоқларига декларацияда кўрсатилмаган, қиймати 833 млн сўмлик 710 грамм заргарлик буюмларини яширгани маълум бўлган.
Айни шу рейс билан келган яна бир фуқаро эса шимининг чўнтаги ва пайпоқларига қиймати 907 млн сўмлик 803 грамм заргарлик буюмларини яшириб олиб кирмоқчи бўлган.
Ҳозирда мазкур ҳолатлар юзасидан божхона органлари томонидан суриштирув ҳаракатлари давом эттирилмоқда, дейилади хабарда.
