13 февраль куни соат 01:00 да Тошкент-Поп йўналиши бўйича қўшимча темирйўл рейси ташкил этилади. Ушбу рейс Қамчиқ довони ёпилгани сабабли ўз манзилларига етиб бора олмаган йўловчилар учун мўлжалланган, деб хабар берди Фавқулодда вазиятлар вазирлиги.

Шунингдек, Попга етиб боргач, мазкур поезд Фарғона водийсидан Тошкентга йўл олган йўловчиларни ҳам олиб қайтади, дея қўшимча қилди вазирлик.

Бир неча соат олдин ҳам вазирлик водий вилоятларига боришни, шунингдек, водий вилоятларидан Тошкент шаҳрига келишни режалаштирган юртдошлар учун «Поп», «Темирйўлобод», «Ангрен» ҳамда «Оҳангарон» вокзалларида қўшимча темирйўл рейслари йўлга қўйилганини хабар қилганди.

Бундан ташқари, X (Twitter) фойдаланувчилари ҳам довон ёпилиб қолгач, «тоғ этагида тумонат одам улар кетаётган поездга ўтқазилгани» ҳақида ёзди.

фавқулодда вазиятлар, қамчиқ довони, қўшимча рейс

12 февраль куни соат 13:00 дан А-373 халқаро автомобиль йўлининг Қамчиқ довони қисми автомобиллар ҳаракати учун вақтинча ёпилганди.

Довонда қор кўчкиси хавфи эълон қилинган, вазирлик кечки пайт воқеа жойига фавқулодда вазиятлар вазири генерал-майор Азизбек Икрамов етиб борганини маълум қилган.

Жараёнга Фавқулодда вазиятлар давлат тизими (ФВДТ) таркибига кирувчи куч ва воситалар жалб этилган ва йўлнинг қатнов қисмига хавф солаётган қор кўчкиларини сунъий равишда тушириш ишлари кетмоқда.

Аввалроқ Ўзгидромет соат 17:00—21:00 оралиғида Қамчиқ довонида ёғган кучли ёғингарчиликлар натижасида 12 000 м³ ҳажмдаги 12 та қор кўчкиси аниқланганини хабар қилганди. Талафот ва жабрланганлар йўқ.