Ўзбекистон президенти Шавкат Мирзиёев Тошкент ва Нукус шаҳарларида «Креатив саноат парклари»ни ташкил этишни маъқуллади. Бу ҳақда 13 февраль куни креатив иқтисодиёт, маданият муассасалари инфратузилмасини ривожлантириш ва янги креатив маконларни яратиш чора-тадбирлари тақдимотида маълум қилинди.
Расмий маълумотларга кўра, 2024 йилда Ўзбекистон ялпи ички маҳсулотида креатив иқтисодиётнинг улуши 3,7 фоизни, яъни 56,8 триллион сўмни ташкил этади. Ушбу соҳадаги экспорт ҳажми 770,6 миллион долларни ташкил этди, иш билан банд бўлганлар сони эса 319 минг кишидан ошди.
Мамлакат аҳолисининг 60 фоиздан ортиғини ёшлар ташкил этади. Рақамли инфратузилманинг фаол ривожланиши ва бой маданий мерос билан биргаликда бу ижодий саноат соҳасида «катта сакраш» учун мустаҳкам пойдевор яратади, дейилади хабарда.
2024 йилда креатив иқтисодиёт бўйича алоҳида қонун қабул қилиниб, соҳанинг ҳуқуқий асослари шакллантирилди. Шунингдек, Креатив индустрия парки ташкил этилиб, унинг резидентлари учун алоҳида солиқ режими жорий этилди.
Хусусан, даромад солиғи ва ижтимоий солиқ ставкаси 12 фоиздан 6 фоизга туширилди. Бундан ташқари, соҳа тадбиркорларига бир қатор қўшимча имтиёзлар берилди.
Ушбу чора-тадбирлар туфайли 2030 йилга бориб ялпи ички маҳсулотда креатив иқтисодиёт улушини 5 фоизга (145 триллион сўм) етказиш, экспортни 1 миллиард долларга етказиш ва 500 мингдан ортиқ аҳолини иш билан таъминлаш режалаштирилган.
Президент администрацияси Креатив иқтисодиёт ва туризм департаменти бошлиғи ҳамда Ўзбекистон маданият ва санъатни ривожлантириш жамғармаси раиси Гаянэ Умерова президентга Тошкентда барпо этилажак Креатив индустрия парки концепциясини тақдим этди.
Лойиҳани давлат-хусусий шериклик асосида амалга ошириш кўзда тутилган.
Ҳудудда қуйидагиларни ташкил этиш режалаштирилмоқда:
- боғ ва санъат объектлари;
- Тошкент халқаро дастурлаш тармоғи мактаби;
- бук-кафе ва спорт майдончалари;
- бадиий ижод павилёнлари;
- коворкинг майдонлар ва офис хоналари;
- кино ва видео ишлаб чиқариш зоналари;
- овоз ёзиш студияси;
- креатив саноатлар кампуси;
- ёшлар ва ижодкорлар учун меҳмонхона.
Янги Тошкент ва Нукусдаги лойиҳалар
Шунингдек, Янги Тошкент ва Нукус шаҳарларида ҳам креатив парклар барпо этиш режалаштирилган. Янги Тошкентдаги паркда резидентлар учун ижарага бериладиган бинолар, студиялар, медиа ва анжуманлар заллари, тижорат ва хизмат кўрсатиш объектлари бўлиши кўзда тутилган.
Нукус шаҳридаги «Истиқлол» боғида мавжуд павильон реконструкция қилиниб, кўп тармоқли ижтимоий-маданий марказга айлантирилади.
Лойиҳанинг ўзига хос жиҳати шундаки, бу ерда Японияда EXPO-2025 кўргазмасида намойиш этилган Ўзбекистон миллий павильонини ўрнатиш режалаштирилган. Унинг ёнида замонавий кутубхона қурилади.
Гаянэ Умерова. Фото: Президент матбуот хизмати
Гаянэ Умерова «Ўзбекистон 24» телеканалига берган интервьюсида Тошкентда иккита креатив парк икки хил ҳудудда — бири шаҳар марказида, иккинчиси Янги Тошкент ҳудудида жойлашишини айтди. Нукусда яна бир креатив кластер ташкил этилмоқда.
«Биз барча ижодкорларни, барча ёш авлодни, креатив иқтисодиёт йўналишларида ишлайдиганларни тўплаш учун креатив паркларни ишлаб чиқмоқдамиз. Бу мамлакатимизда аниқланган 16 та асосий йўналиш бўлиб, биз уларни бир ҳудудда бирлаштирмоқдамиз», — деди у.
Унинг сўзларига кўра, ушбу учта креатив кластернинг барчаси ягона концепция асосида ишлайди.
«Назариядан ушбу лойиҳаларни амалга оширишга ўтишимиз учун бугун президент маъқуллаши биз учун муҳим эди. Аслида, креатив кластер IT парк билан бир хил, фақат янада кенгайтирилган. Ишлар параллел равишда олиб борилади, чунки бу 16 та йўналиш», — деди Умерова.
2024 йил июнь ойида президент мамлакатнинг ҳар бир ҳудудида «Креатив индустрия парки» ташкил этилишини, уларга ИТ-парк резидентлари учун назарда тутилган имтиёзлар берилишини маълум қилган эди. Шунингдек, 14 та туманда «тўртинчи саноат инқилоби» касб-ҳунарларига ўқитиш марказлари ташкил этиш режалаштирилган.