Қирғизистон президенти Садир Жапаров жамиятдаги бўлинишнинг олдини олиш мақсадида Қамчибек Ташиевни бош вазир ўринбосари — Миллий хавфсизлик давлат қўмитаси (МХДҚ) раиси лавозимидан бўшатганини маълум қилди.
«Агар мен ўз вақтида шундай қатъий қадамларни ташламаганимда, бу оддий фуқароларга ҳам ўтиши ва халқ ҳам иккига бўлинишни бошлаши мумкин эди», — деди у «Кабар» давлат ахборот агентлигига берган интервьюсида.
Унинг сўзларига кўра, низо Жогорку Кенешда (парламентда) етила бошлаган, у ерда бир гуруҳ депутатлар парламентарийларни Ташиев тимсолидаги «генерал томони» ва «президент томони»га ажрата бошлаган. Кейинчалик, Жапаровнинг таъкидлашича, улар муддатидан олдин сайловлар ўтказиш учун имзо тўплашга киришган.
«Қўлимда депутатлар ва айрим давлат хизматчилари „генерал“ билан қўрқитилаётгани ҳақида фактлар бор эди. Уларга: „Агар бизнинг томонимизга ўтмасанг, генерал билан ҳисоблашасан“, дейишган. Айнан шунинг учун ҳам мен шундай қарор қабул қилишга мажбур бўлдим», — деб таъкидлади Қирғизистон президенти.
У Ташиевни ишдан бўшатишдан олдин унга қўнғироқ қилганини ва «бу ерда содир бўлаётган вазиятни тушунтирганини» ишонтириб айтди.
«Мен ушбу тезкор қарорим билан, аксинча, дўстимни асраб қолдим деб ҳисоблайман. Чунки унинг ёнида бўлганлар… дўстимни тўғри йўлдан оздиришган… Бу давлат аппарати ходимлари ва жамият орасида бўлинишларга, шунингдек, эҳтимолий тўқнашувларга олиб келиши мумкин эди», — деди Жапаров.
«Конституция президент зиммасига давлат яхлитлигини, халқ ва давлат хизматчиларининг бирлигини сақлаш мажбуриятини юклайди. Мен бу мажбуриятни қатъий бажардим. Чунки давлат ва бутун халқ манфаатлари лавозимлардан ҳам, дўстликдан ҳам устундир», — дея қўшимча қилди у.
Журналист Жапаровдан 2021 йилги сайловлар олдидан у ва Ташиев ўртасида «бир муддат — у, бир муддат — унинг яқин дўсти» деган келишув бўлгани ростми деб сўради. Президент давлатни ким бошқаришини «бир ҳовуч одам эмас, Қирғизистон халқи ҳал қилишини» айтди.
Жапаров, шунингдек, Ташиев билан дўстлиги сақланиб қолишини таъкидлади. «Қарорим давлатимиз ва халқимизнинг тинчлиги ҳамда бирлиги йўлида қабул қилинди. Дўстлигимизни бирор лавозим ёки манфаатларга боғлаш нотўғри», — деди у.
- Қамчибек Ташиев ва унинг ўринбосарлари 10 февраль куни истеъфога чиқарилди. МХДҚ раиси вазифасини бажарувчи этиб Жумгалбек Шабданбеков тайинланди. У 2020 йилдан буён МХДҚ раиси ўринбосари ва 9-хизмат бошлиғи лавозимида ишлаб келаётганди.
- Ташиевнинг ўзига кўра, ишдан бўшатиш ҳақидаги хабар у учун «мутлақо кутилмаган» бўлган. У ўша вақтда Германияда даволанаётганини айтди. «Нима бўлган тақдирда ҳам, биз президент қарорини бажаришга мажбурмиз. Мен давлатимизга, халқимизга ва президентимизга ҳалол хизмат қилдим ва бундан фахрланаман!» — деди МХДҚ собиқ раҳбари.