Италияда бўлиб ўтаётган 2026 йилги қишки Олимпиадада фигурали учиш бўйича қатнашаётган қозоғистонлик спортчи Михаил Шайдоров олтин медални қўлга киритди. Бу ҳақда Tengri Sport хабар қилди.
Қисқа дастурдан сўнг у 92,94 балл билан бешинчи ўринни эгаллаб турганди. Медалга эга чиқиш учун у рақобатчилари билан орадаги 9,6 баллик фарқни ёпиши керак эди.
Шайдоров ўз дастурида тўртламчи лутц сакрашида кичик хатога йўл қўйди, бироқ қолган чиқишларини деярли мукаммал бажарди. Мусобақа бошланишидан аввал ОАВ кун бўйи қозоғистонлик спортчи таваккал қилиши ва тўртта ўрнига бешта тўртламчи сакрашни (квад) ижро этиши мумкинлиги ҳақида ёзганди — у бу вазифани аъло даражада уддалади. Якунда Михаил Шайдоров жами 291,58 балл жамғариб, шахсий рекордини янгилади.
Қисқа дастурдан сўнг иккинчи ўринда бораётган япониялик Юма Кагияма эркин дастурда бир нечта хатога йўл қўйди ва дастлабки босқичдаги 11 баллик устунлигини бой берди. АҚШлик жаҳон чемпиони Илья Малинин эса эркин дастур давомида бир неча бор йиқилиб тушди ва икки дастур натижасига кўра Шайдоровнинг ўзидан ўзиб кетишига имкон бериб қўйди.
Михаил Шайдоровнинг фигурали учишдаги ушбу олтин медали Қозоғистон учун 2026 йилги қишки Олимпиада ўйинларидаги илк соврин бўлди.
Шайдоров мамлакат тарихида бундай натижага эришган иккинчи вакил бўлди — бунгача фақат чанғичи Владимир Смирнов 1994 йилги Лиллехаммер (Норвегия) Олимпиадасида олтин медални қўлга киритган эди.
Михаил Шайдоров 21 ёшда, у Қозоғистонда туғилган ва ушбу мамлакат терма жамоасида ўйнайди. 2025 йилда Шайдоров тўрт қитъа чемпиони ва жаҳон чемпионатининг кумуш медали совриндори бўлганди (у ерда биринчи ўринни Иля Малинин эгаллаган). Унинг мураббийи 1994-йилги Олимпия чемпиони, россиялик Алексей Урманов.
