14 ва 15 февраль кунлари Милан-Кортина-2026 қишки Олимпия ўйинларида ўзбекистонлик спортчилар иштирок этди, дея хабар қилди Ўзбекистон Миллий олимпия қўмитаси.
Медет Назаров гигант слаломнинг биринчи пойгасида 1:25.75 дақиқа натижа кўрсатган бўлса, иккинчисида бу кўрсаткични 1:21.14 гача яхшилади.
Икки старт натижаларига кўра, у пойга етакчисидан 21,9 сония ортда қолган ҳолда 2:46.89 умумий вақт билан маррага етиб келди ва ўз дастурида 50-ўринни эгаллади. Олтин медални бразилиялик спортчи, кумуш ва бронзани эса швейсариялик иштирокчилар қўлга киритди.
Конькичи Даниил Ейбоғнинг чиқиши 15 февралга ўтар кечаси бўлиб ўтди.
Чорак финал пойгасида у 1500 метр масофани 2:16.963 натижа билан учинчи бўлиб босиб ўтди ва ярим финалга йўл олди.
Кейин Ейбог 2 дақиқа 18 сония натижа билан ярим финал пойгасида учинчи ўринни эгаллади. Бу «А» финалга чиқиш учун етарли бўлмади.
Спортчи «B» гуруҳи финалида пешқадамлик учун кураш олиб борди ва 2:35.103 кўрсаткич билан бешинчи ўринни эгаллади. Умумий ҳисобда у 14-ўринни эгаллаб турибди. Рейтингнинг дастлабки уч поғонасини 2 дақиқа-ю 2 сонияда босиб ўтган Нидерландия, Жанубий Корея ва Латвия спортчилари қўлга киритди.
«Охирги давралар даҳшатли даражада оғир кечди. Ҳар сафар ирода ва матонат ҳисобига маррага интилдим. Ҳаёлимда фақат бир гап айланди: „Силтан, силтан, яна силтан“», — дея ўз таассуротлари билан ўртоқлашди Даниил Ейбог чиқишидан сўнг.
Конькида учувчининг айтишича, машғулот майдонида муз қаттиқроқ, мусобақа майдонида эса юмшоқроқ бўлади. Аввалига, унинг сўзларига кўра, у «500 метрга ўзини асрашни» режалаштирган, аммо кейин фикридан қайтиб, охиригача курашишга қарор қилган. Спортчининг таъкидлашича, ушбу чиқиш келажакда натижаларни таҳлил қилиш ва яхшилаш учун сабаб бўлади.
Медет Назаровнинг навбатдаги чиқиши 16 февраль куни соат 14:00 да слалом йўналишида бўлиб ўтади. Рейтингда у 96 та даъвогар орасида 64-ўринни эгаллаб турибди.
Шунингдек, Даниил Ейбог 16 февраль куни соат 15:17 да 500 метрга югуриш мусобақасида иштирок этади. Саккизинчи даврада у АҚШ, Нидерландия ва Украина вакиллари билан муз майдонига тушади.