Ўзбекистон бозорига 2026 йил мамлакатда ишлаб чиқариладиган 5 та янги автомобиль модели тақдим этилади. Бу ҳақда «Ўзавтосаноат» бошқарув раиси Улуғбек Розикулов 13 февралда бўлиб ўтган президент раислигидаги йиғилишда маълум қилди.
Йиғилишда президент Марказий банк ва «Ўзавтосаноат»га маҳаллий автомобилларга талабини рағбатлантириш мақсадида автокредит ставкасини пасайтириш ва ҳажмини ошириш чорасини кўришни топширди.
Розикулов автокредит бўйича 13 та банк билан ишланаётганини, бир кунда 1500 га яқин шартнома имзоланаётганини маълум қилди. «Бу дегани 20 кун ишлайдиган бўлса, 30 000 дан зиёд харидор чиқяпти-да, ҳозирги қиш пайтида ҳам», — деди у.
Шунингдек, «Ўзавтосаноат» раиси 2026 йилда бозорга 5 та янги автомобиль модели тақдим этилишини қайд этди.
«Шу йилнинг ўзида бешта янги модель бозорга тақдим қилинади. Янги Damas чиқди, савдони бошлаймиз. У тўлақонли ўзлаштирилди. Шу йилда янги Captiva ва Traverse ва Kia моделлари чиқади. [Булар] ўзимизда локализация қилинган маҳсулотлар. Бунга қўшимча BYD заводи бўйича жуда катта ўзгариш бўлди. Хитойликлар томонидан Yuan Up автомобили. Шу машина ҳозир бутун дунёда энг кўп сотиладиган модель. Бизнинг бозоримизда фақат шу модель сотуви бўйича 25 000 та потенциални топдик. Шу модель бу йили Жиззах заводида чиқади», — деди Розикулов.
Декабрь охирида UzAuto Motors Chevrolet Damas’нинг янги — йўловчи (Move) ва юк (Мах) моделларини тақдим этди. Бу қарийб 30 йил ичида моделнинг биринчи кенг кўламли янгиланишидир. Автомобилнинг йўловчи модели нархи 139 675 000 сўмдан, юк модели эса 134 439 000 сўмдан бошланади.
BYD Yuan Up эса Хитойнинг энг йирик ишлаб чиқарувчисининг шаҳар учун e-Platform 3.0 асосида яратилган ихчам электр кроссовери (B-SUV). Автомобиль 401 км гача юриш масофасини таклиф қилади.
Yuan Up 2024 йил охирида Ўзбекистонда тақдим этилган. «Ўзавтосаноат» маълумотларига кўра, 2025 йилда мамлакат бозорида ушбу моделдаги 6242 та электромобиль сотилган (сотиш бўйича 8-ўрин).
