Бугун, 17 февраль куни эрта тонгда Германияда ўтказилган “Freestyle Chess” бўйича жаҳон чемпионати совриндори Нодирбек Абдусатторов Тошкент халқаро аэропортида тантанали равишда кутиб олинди.
300 минг АҚШ доллари мукофот жамғармасига эга нуфузли мусобақада дунёнинг 8 нафар энг кучли шахматчилари ўзаро баҳс олиб борди. Шиддатли ва муросасиз кечган учрашувлар якунида гроссмейстеримиз жаҳон чемпионатининг бронза медалига эга чиқди. Ушбу натижа орқали Абдусатторов 40 минг АҚШ доллари мукофот пулини ҳам қўлга киритди.
Шунингдек, Нодирбек бронза медали билан бирга 2027 йилда ўтказиладиган навбатдаги жаҳон чемпионатига йўлланмани ҳам қўлга киритди.
Кутиб олиш маросимида Ўзбекистон шахмат федерацияси мутасаддилари, спорт жамоатчилиги ва кўплаб мухлислар иштирок этди.