Ўзбекистонда 2026 йил январь-февраль ойларида наркотик ва психотроп моддаларнинг ноқонуний айланмасига қарши ўтказилган тезкор тадбирлар давомида 22 та уюшган наркожиноий гуруҳ фаолиятига чек қўйилди. Бу ҳақда «Ўзбекистон 24» телеканалида хабар берилди.
Маълум қилинишича, ушбу гуруҳларнинг 5 нафар етакчиси ва 84 нафар аъзоси қўлга олинган. Уларнинг 20 нафари психотроп дориларни, 28 нафари анъанавий наркотикларни тарқатиш билан шуғулланган. Яна 41 нафар шахс синтетик наркотикларни интернет орқали ташкил этилган наркодўконлар орқали тарқатган.
ИИВ маълумотларига кўра, 2025 йил давомида 14 та яширин нарколаборатория аниқланган бўлса, жорий йилнинг икки ойидаёқ 8 таси фош этилган. Уларнинг 3 таси психотроп моддалар тайёрлаш билан шуғулланган яширин цехлар, 5 таси эса синтетик наркотиклар ишлаб чиқарган лабораториялар бўлган.
Тезкор тадбирлар натижасида икки ой ичида 41 кг анъанавий наркотик, 100 кгдан ортиқ синтетик наркотик, бир миллион дозага тенг қарийб 200 минг дона психотроп дори воситаси ҳамда икки тоннага яқин прекурсорлар ноқонуний муомаладан олиб қўйилган.
Тергов маълумотларига кўра, фош этилган гуруҳлар айрим ҳолларда уч ойдан 10 йилгача жиноий фаолият билан шуғулланган. Улар бир йилда ўртача бир миллион донадан ортиқ психотроп дори воситаларини, шунингдек икки-икки ярим тонна гашиш ва опий каби наркотик моддаларни ўтказган.
Интернет орқали фаолият юритган наркодўконлар эса бир йилда ўртача 350 кг, уч йил мобайнида эса 708 кг (тўрт миллион дозага тенг) синтетик наркотик моддаларни «закладка» усулида тарқатгани аниқланган.
Наркотик моддалар Тошкент, Наманган, Андижон, Самарқанд ва Сирдарё вилоятларининг жами 40 та туман ва шаҳарларида тарқатилган.
ИИВга кўра, наркотик савдоси трансчегаравий ва виртуал характерга эга бўлиб, моддалар Афғонистондан Сурхондарё орқали, Қирғизистондан Наманган ва Андижон орқали, Қозоғистондан эса Тошкент вилояти орқали контрабанда йўли билан олиб кирилган.
Ҳозирда уюшган наркожиноий гуруҳларнинг барча алоқалари ва молиявий манбалари бўйича комплекс тезкор-қидирув тадбирлари давом эттирилмоқда.
ИИВ фуқароларни шубҳали шахслар ёки фаолият ҳақида @stopnarko_bot Telegram боти ёки 71−231−55−54, 71−231−55−00 ишонч телефонлари орқали хабар беришга чақирди.
Эслатиб ўтамиз, 20 январь кунидан бошлаб бир ҳафта ичида ўтказилган махсус тезкор тадбирлар давомида республика бўйлаб 123 килограмм гиёҳвандлик воситаларининг ноқонуний айланмасига чек қўйилган эди.
2025 йилда Ўзбекистонда 15,4 мингта наркожиноят қайд этилиб, салкам 3,5 тонна гиёҳвандлик моддалари мусодара қилинган. Наркожиноят содир этган 11 минг 49 киши жавобгарликка тортилди. Жиноятларнинг 53 фоизи Тошкент шаҳри, Фарғона ва Тошкент вилоятлари ҳиссасига тўғри келди.
Шавкат Мирзиёев 26 декабрь куни Олий Мажлис ва Ўзбекистон халқига қилган мурожаатида наркожиноятларга қарши кураш умуммиллий ҳаракат даражасига кўтарилишини маълум қилганди. Шунингдек, президент ўзини қонундан устун қўяётган тўдалар, тадбиркорларга босим ўтказаётган «кўча» вакиллари ва спортчиларнинг жиноятга аралашиб қолаётганини танқид қилиб, давлат уларни жиловлашга қодир эканини таъкидлади.
27 январь кунги йиғилишда эса давлат раҳбари наркотикларга қарши курашда давлат органлари ишини танқид қилди. Эртаси куни президент Равшан Маматовни ПА ҳузуридаги Наркотиклар ва ўқотар қуролларни назорат қилиш агентлиги директори лавозимидан озод қилишга доир фармонни имзолади.