Марказий банк маълумотларига кўра, Ўзбекистонда долларнинг расмий курси январь ойидаги мустаҳкамланишдан кейин февралда пасайди.
Ўтган ой давомида сўм долларга нисбатан 0,7 фоизга ёки 88,59 сўмга — 12 225,16 сўмдан 12 136,57 сўмгача мустаҳкамланди. Таққослаш учун, январь ойида сўм 1,6 фоизга қадрсизланган эди.
2025 йилнинг февраль ойи билан солиштирганда, мустаҳкамланиш бироз кучсизроқ бўлди: бир йил аввал сўм 0,8 фоизга ошганди. Шу билан бирга, аввалги йилларнинг февраль ойида миллий валюта ўртача 0,5 фоиз атрофида қиймат йўқотган.
2022−2026 йилларда февраль ойидаги алмашув курсининг ўзгариши. Манба: Mirkonomika / Telegram
Жанубий Кореянинг Чонбук Миллий университети «Халқаро савдо» йўналиши магистри, иқтисодчи ва Telegram’даги Mirkonomika канали муаллифи Миркомил Холбоев ой давомида курс нисбий барқарорликни намойиш этганини таъкидлади: 10 та савдо сессиясида сўм мустаҳкамланган, қолган 10 тасида эса (асосан ой бошида) қадрсизланган.
Унинг сўзларига кўра, ўртача кунлик волатиллик 0,21% ни ташкил этган, бу январь ойидаги кўрсаткичдан пастдир. Шу билан бирга, бу кўрсаткич сўм-доллар жуфтлиги учун ўтган йилнинг май ойидан — валюта коридори кенгайтирила бошланган пайтдан бери энг паст волатиллик ҳисобланади.
Ўзбекистоннинг асосий савдо ҳамкорлари валюталари орасида февраль ойида Хитой юани 1,6 фоизга мустаҳкамланди, Россия рубли ва қозоқ тенгеси эса 0,1 фоизга қадрсизланди. Жаҳон валюталари ичида Британия фунти 1,2 фоизга, япон иенаси 0,6 фоизга, евро 0,2 фоизга пасайди, Швейцария франки эса 0,03 фоизли арзимас мустаҳкамланишни кўрсатди.
Шунингдек, у валюта бозорларида волатилликнинг умумий пасайишини қайд этмоқда: ўтган ойга нисбатан евронинг тебраниши 0,43 фоиздан 0,25 фоизгача, рублники — 0,68 фоиздан 0,48 фоизгача, иенаники эса 0,75 фоиздан 0,46 фоизгача камайган.