Жанубий Суданнинг Рувенг минтақавий штатидаги Абиэмном округига ўнлаб қуролли ёшлар томонидан уюштирилган ҳужумда камида 169 киши, жумладан, икки юқори мартабали маҳаллий амалдор ҳалок бўлди ва 50 киши яраланди.
Рувенг минтақавий ахборот вазири Жеймс Монилуак Мижок ҳужум ҳақида эълон қилди.
Унинг сўзларига кўра, ҳужум якшанба куни эрта тонгда содир бўлган ва бир неча соат давом этган. Ҳужумчилар бозорлар ва турар-жой биноларига ўт қўйишган.
Вазир армия ҳужумчиларни ҳудуддан ҳайдаб чиқаришга муваффақ бўлганини ва Абиэмном округи маъмурияти энди вазиятни тўлиқ назорат қилаётганини таъкидлади.
Жанубий Судандаги Бирлашган Миллатлар Ташкилотининг миссияси (UNMISS) сўнгги 48 соат ичида Абиэмномда зўравонликнинг кучайиши ҳақида хавотир билдирди. «Тинчликпарвар кучлар мингдан ортиқ тинч аҳолини ҳудуддаги миссионерлик базасида жойлаштирди ва жароҳатланганларга шошилинч тиббий ёрдам кўрсатмоқда», дейилади UNMISS баёнотида.