Мексиканинг “Халиско янги авлод картели” раҳбари, «Эл Менчо» лақаби билан танилган Рубен Осегера Сервантеснинг жасади Халиско штати Сапопан муниципалитетидаги қабристонга олтин тобутда олиб келинди. Бу ҳақда El Universal газетаси хабар қилди.
Маълум қилинишича, мотам кортежи 2 март куни Халиско штати пойтахти Гвадалахара шаҳридаги дафн маросимлари бюросидан йўлга чиққан. Қабристонга етиб келганда катафалкни оркестр кузатиб боргани қайд этилган. Дафн маросими ёпиқ тарзда ўтказилган.
Нашрнинг таъкидлашича, жасадни ташиш ва дафн қилиш жараёни кенг қамровли хавфсизлик чоралари билан бирга амалга оширилган. Кортеж йўналиши ва “Ресинто де ла Пас” қабристони ҳудуди федерал ва минтақавий куч тузилмалари ходимлари томонидан қўриқланган. Шунингдек, дафн бюроси олдида ҳарбийлар ва зирҳли техника навбатчилик қилган.
Мексика Миллий мудофаа вазирлиги 22 февраль куни “Халиско янги авлод картели” раҳбари Рубен Осегера Сервантес йўқ қилинганини эълон қилган эди.
Эслатиб ўтамиз, наркобарон ўлдирилгач, мамлакатни зўравонлик тўлқини қамраб олганди.
Шундан сўнг, Мексика президенти Клаудия Шейнбаум баёнот билан чиқиб, Мексикага саёҳат қилаётган мухлислар учун «ҳеч қандай хавф йўқлигини» айтганди.