Ўзбекистон ички ишлар вазирининг биринчи ўринбосари, ИИВ Жамоат хавфсизлиги департаменти (ЖХД) бошлиғи генерал-майор Рустам Жўраев Тошкент шаҳри ИИББда йўл ҳаракати хавфсизлиги масалаларига бағишланган йиғилиш ўтказди. Бу ҳақда ЖХД таркибига кирувчи ЙҲХХ матбуот хизмати хабар берди.
Йиғилиш Тошкент марказида мактаб ўқувчиси бошқарувидаги BMW M4 ЙПХ инспектори Ҳосилбек Эшназаровни уриб юборганидан олти кун ўтиб бўлиб ўтди. Инспектор қўпол қоидабузарликлар билан (кейинчалик маълум бўлишича, биринчи марта эмас) ҳаракатланаётган ҳайдовчини тўхтатиш чораларини кўришга уринган эди. Орадан икки кун ўтиб, инспектор ҳушига келмай вафот этган.
Ҳалокатдан кўп ўтмай, Uzbelas Performance тюнинг-ательеси раҳбари Асадбек Жумаев ҳибсга олинди. У машиналарга махсус сигналлар ўрнатганини ва ЙҲҲҚ бузилиши акс этган видеоларни эълон қилиб борганини тан олган.
Бу икки ҳолат сўнгги йилларда оммавий тус олган йўл ҳаракати қоидаларига очиқдан-очиқ ва намойишкорона менсимаслик муаммосини кўрсатиб берди.
26 февралдан бошлаб Ўзбекистонда кўчалардаги тунги рейдлар, интернет тармоғида йўл безорилиги акс этган материаллар мониторинги ҳамда автосервис шохобчаларидаги текширувлар кучайтирилди.
Йиғилишда ЖХД раҳбари авариялар сонини камайтириш, оғир оқибатли ЙТҲларнинг олдини олиш, стационар ва мобил постлар иши самарадорлигини ошириш бўйича вазифаларни белгилаб берди.
Ижтимоий тармоқлар ва мессенжерларда хавфли ҳайдаш ҳамда ноқонуний кўча пойгаларини тарғиб қилувчи видеоматериалларни жойлаштирган шахсларни жавобгарликка тортиш масаласи алоҳида таъкидланди. ЙҲҲҚнинг қўпол бузилишини оммалаштирувчи аккаунтларни блоклаш режалаштирилмоқда.
ЙҲХХ маълумотларига кўра, 26 февралдан 3 мартгача интернет платформалар мониторинги давомида йўл безорилиги фактлари акс этган 107 та видеоматериал аниқланган. 66 нафар ҳайдовчига нисбатан маъмурий баённомалар расмийлаштирилган. 62 та транспорт воситаси жарима майдончаларига жойлаштирилган.
Шу кунлар ичида мамлакат бўйлаб жами 5919 та қўпол йўл ҳаракати қоидабузарлиги аниқланди, барча автомобиллар жарима майдончаларига жойлаштирилди. Асосий қоидабузарлик турлари қуйидагилардан иборат бўлди: ноқонуний тонировка — 116 ҳолат, ЙПХ ходимларининг талабларига бўйсунмаслик — 70, сирена ва милтилловчи чироқларни ноқонуний ўрнатиш — 61, давлат рақамисиз бошқариш — 34, пойгаларда иштирок этиш — 4.
Қоидабузарларнинг 54 нафари вояга етмаганлар экани аниқланди.
Бундан ташқари, ЙҲХХ ходимлари патруль-пост хизмати ходимлари билан ҳамкорликда 262 та ўткир тиғли жисмларни олиб юриш ва 23 та гиёҳвандлик ҳамда психотроп моддаларни ноқонуний сақлаш ҳолатларини аниқлади.
ЙҲХХ ходимлари, шунингдек, тюнинг хизматларини кўрсатувчи 68 та компания раҳбарлари ва уларнинг 79 нафар ходимлари билан сўров ўтказди. Автосервисларнинг 100 нафар раҳбари билан профилактик суҳбатлар олиб борилди.