Ўзбекистон ҳукумати 28 февралдаги қарори билан Тошкент шаҳрининг 2045 йилгача бўлган бош режасининг асосий кўрсаткичларига ўзгартиришлар киритди. Ушбу бош режа 2024 йил 24 декабрда тасдиқланганди.
Ҳужжатга янги турар жой массивлари, меҳмонхоналар, бизнес марказлари, ижтимоий объектлар ва саноат зонасини қуриш бўйича инвестиция лойиҳаларининг параметрлари киритилган.
Бош режага тузатишлар киритиш бўйича таклифлар Урбанизация ва уй-жой бозорини барқарор ривожлантириш миллий қўмитаси, Қурилиш ва уй-жой коммунал хўжалиги вазирлиги ҳамда пойтахт ҳокимлиги томонидан киритилди.
Инвестиция лойиҳалари
Қарорга кўра, хорижий ва маҳаллий инвесторлар томонидан умумий қиймати 16,2 млрд доллардан ортиқ бўлган 31 та инвестиция лойиҳаси концепцияси ишлаб чиқилган.
Уларни умумий майдони 2311,4 гектар бўлган ер участкаларида амалга ошириш режалаштирилган. Қурилиш ишлари ҳисобига ҳар йили қўшимча равишда қуйидагилар таъминланиши кутилмоқда:
- 1,5 млрд доллар миқдорида ялпи ҳудудий маҳсулот;
- 3,5 трлн сўм миқдорида соф солиқ тушумлари;
- 260 мингта янги иш ўрни яратилиши.
Ташаббусларнинг катта қисми кўп квартирали турар жой мажмуаларини қуриш билан боғлиқ. Уларнинг таркибига қуйидагилар киради:
- кўп қаватли уйлар (жумладан, 9 ва 16 қаватли);
- биринчи қаватларида тижорат бинолари бўлган турар жой мажмуалари;
- маиший хизмат кўрсатиш объектлари;
- ижтимоий-дам олиш инфратузилмаси.
Лойиҳалар Бектемир, Миробод, Сергели, Чилонзор, Яшнобод, Мирзо Улуғбек, Шайхонтоҳур, Юнусобод, Учтепа ва Янгиҳаёт туманларида амалга оширилиши режалаштирилган.
Шаҳар марказида ва алоҳида ҳудудларда бир нечта беш юлдузли меҳмонхоналар қурилиши кўзда тутилган.
Tonino Lamborghini Residences лойиҳаси алоҳида ажралиб туради — у премиум-классдаги апартаментлар, беш юлдузли меҳмонхона ва бизнес-марказни ўз ичига олади.
Рўйхатдан, шунингдек, замонавий бизнес марказлар, савдо марказлари, кўп тармоқли савдо ва хизмат кўрсатиш мажмуалари ҳам ўрин олган.
Лойиҳалар орасида талабалар ётоқхонаси, клиника ва соғломлаштириш маркази, маиший хизмат кўрсатиш объектлари ва жамоат инфратузилмасини қуриш ишлари ҳам бор.
Янгиҳаёт туманида эса «Янги авлод» саноат зонасида ишлаб чиқариш ва хизмат кўрсатиш объектларини ташкил этиш режалаштирилган. Ушбу лойиҳа йирик индустриал майдончани шакллантиришни назарда тутади.
Яшил зоналар учун — камида 30%
Реновация ва реконструкция лойиҳаларини амалга оширишда мажмуавий қурилиш тамойили мустаҳкамланди. Хусусан:
- ҳар бир лойиҳа ҳудудининг камида 30 фоизи яшил зоналар учун ажратилиши шарт;
- эскирган бинолар жойлашган кварталларни мажмуавий янгилаш кўзда тутилган;
- майдони 1 гектаргача бўлган участкаларда тарқоқ ва зич қурилишлардан воз кечиш режалаштирилмоқда.
Бундан ташқари, қурувчилар томонидан тўланадиган инфратузилма тўловлари ва бошқа ажратмалар ҳисобига қўшимча жамоат парклари ташкил этилиши керак.
Пойтахт ҳокимлиги ҳузуридаги «Ташкент инвест» компанияси биринчи навбатда тўққизта ҳудудда умумий майдони 139,6 гектар бўлган янги яшил майдонларни барпо этади. Улар қуриб битказилгандан сўнг консервация зонасига ўтказилади.
Бош режалар ва оширилган коэффициентлар
Ҳар бир лойиҳа учун икки ой муддатда меъморий, муҳандислик ва ижтимоий-иқтисодий параметрларни ҳисобга олган ҳолда мастер-режалар ишлаб чиқилади. Улар Тошкент шаҳри қурилиш бош бошқармаси ҳузуридаги Ҳудудий архитектура-шаҳарсозлик кенгашида кўриб чиқилади ва шаҳар ҳокимлиги томонидан тасдиқланади.
Муҳандислик тармоқлари ва транспорт инфратузилмасини яратиш харажатларини қисман қоплаш учун инвесторлардан инфратузилма тўловлари ундирилади.
Бунда инфратузилма тўловининг базавий ставкасига қурилиш зичлиги, яшил ҳудудлар улуши ва ижтимоий инфратузилмага тушадиган юкламадан келиб чиқиб, 1,1 дан 3 гача бўлган оширувчи коэффициентлар қўлланиши мумкин. Тегишли қарор архитектура-шаҳарсозлик кенгаши тавсиялари асосида халқ депутатлари Тошкент шаҳри кенгаши томонидан қабул қилинади.
Қарор билан лойиҳалаш ва қуриш ишларида халқаро ва хорижий норматив-техник ҳужжатлардан фойдаланишга рухсат берилди. Бунда уларни мутлақо миллий шаҳарсозлик нормаларига мослаштириш ва экспертизадан ўтказиш талаб этилади.
Бино ва корхоналарни лойиҳалашда табиий газ ўрнини босувчи муқобил ёқилғи турларидан ва энергия тежовчи технологиялардан фойдаланиш кўзда тутилиши шарт.
Эслатиб ўтамиз, тўққизта жамоат паркини ташкил этиш лойиҳалари 25 февраль куни президентга тақдим этилган эди. Хабар қилинишича, ушбу 139,6 гектарлик парклардан ташқари, янги қурилиш лойиҳаларидаги яшил зоналар (ҳудуднинг камида 30 фоизи) яна тахминан 400 гектарни ташкил этади.