Февраль ойида Тошкент автобусларида чиптасиз юрганларга нисбатан 10 мингдан ортиқ баённома расмийлаштирилди, деб хабар бермоқда Тошкент шаҳар транспорт бош бошқармаси.
Қайд этилишича, «Тошкент шаҳар жамоат транспортини мониторинг ва назорат қилиш» давлат муассасаси томонидан пойтахт автобусларида йўл ҳақини тўламасдан ҳаракатланаётган йўловчиларга нисбатан кучайтирилган рейд тадбирлари давом этмоқда.
2026 йил февраль ойида чиптасиз юрган йўловчиларга нисбатан 10 280 та маъмурий баённома расмийлаштирилган. Йил бошидан буён эса бу кўрсаткич 21 782 тани ташкил этган. Январь ойида автобусда чиптасиз юрган 11 502 йўловчи жаримага тортилган эди.
Муассаса йўловчиларни йўл ҳақини ўз вақтида ва белгиланган тартибда тўлашга чақирди.
Маълумот учун, Маъмурий жавобгарлик тўғрисидаги кодекснинг 144-моддаси (Чиптасиз юриш)га кўра, жамоат транспортида йўлкира тўламаган йўловчига БҲМнинг 1/10 қисми (41 200 сўм) миқдорида жарима белгиланади.
Чиптасиз юрганларни жаримага тортиш 2025 йил 14 мартдан бошланган. Август ойида ўшандан буён Тошкент автобусларида чиптасиз юрган 4090 йўловчига маъмурий чоралар кўрилгани хабар берилганди.
2025 йилда Тошкент шаҳрида автобусда йўловчи ташишдан олинган даромад 16 фоизга ошиб, 644 млрд сўмга етди. Автобуслар ҳаракат интервали икки баробарга қисқариб, 18−20 дақиқадан 8−10 дақиқага тушгани қайд этилган. Шу билан бирга, кунлик йўловчи оқими 650 мингдан 1,4 миллион нафаргача кўпайган.
