АҚШ президенти Дональд Трамп маъмурияти Николас Мадуро ўғирлаб кетилганидан кейин ушбу лавозимни эгаллаган Венесуэла муваққат президенти Делси Родригесга нисбатан махфий равишда жиноий айблов тайёрламоқда. Бу ҳақда Reuters вазиятдан хабардор тўртта манбага таяниб хабар берди.
Агентлик суҳбатдошларининг сўзларига кўра, федерал прокурорлар коррупция ва пул ювиш бўйича айбловларни тайёрламоқда ҳамда Родригесни агар у Мадуро ағдарилганидан кейин Трампнинг талабларини бажаришда давом этмаса, таъқибга учраши ҳақида оғзаки равишда огоҳлантириб улгурган.
Айблов лойиҳаси Майами прокуратураси томонидан сўнгги икки ой давомида тайёрланмоқда, деб аниқлик киритди Reuters манбалари. Тергов Родригеснинг PDVSA давлат нефть компаниясининг маблағларини ювишдаги эҳтимолий иштироки билан боғлиқ бўлиб, 2021 йилдан 2025 йилгача бўлган даврни ўз ичига олади.
АҚШлик мулозимлар Родригесга камида етти нафар собиқ юқори мартабали амалдорлар, уларнинг ҳаммаслаклари ва оила аъзолари рўйхатини тақдим этган. АҚШ уларни Венесуэлада ҳибсга олишни ёки кейинчалик экстрадиция қилиш учун қамоқда қолдиришни талаб қилмоқда.
АҚШ Адлия вазирлиги, Оқ уй ва Давлат департаменти Reuters сўровига жавоб бермади. АҚШ бош прокурори ўринбосари Тодд Бланш агентлик хабарининг қисқача мазмунига изоҳ берар экан, буни «мутлақо ёлғон» деб атади.
Делси Родригес 3 январга ўтар кечаси Николас Мадуро Америка ҳарбийлари томонидан қўлга олинганидан кейин Венесуэла муваққат президенти бўлганди. Сиёсатчи ва унинг рафиқаси Силия Флорес Нью Йоркка олиб кетилган. АҚШ расмийлари Мадурони наркотерроризм мақсадида тил бириктириш, кокаин олиб кириш, шунингдек, АҚШга қарши қўллаш мақсадида қурол ва портловчи қурилмаларни сақлашда айбламоқда.
Дональд Трамп шундан сўнг АҚШ Венесуэлани «хавфсиз, тартибли ва қонуний ҳокимият топширилишини амалга оширмагунча» «бошқаришини», шунингдек, мамлакатнинг нефть заҳираларини назорат остига олишини маълум қилган.
Трамп Родригесдан «уларнинг мамлакатини қайта тиклаши учун нефть ва бошқа нарсалардан тўлиқ фойдаланиш имкониятини» талаб қилган ва агар у ўзини «тўғри тутмаса», Мадуроникидан ҳам ёмонроқ қисмат кутиши мумкинлиги билан таҳдид қилган.