Эрон томонидан учирилган баллистик ракета Ўрта ер денгизнинг шарқий қисмида НАТО ҳаво мудофаа тизимлари томонидан йўқ қилинган. Anadolu ахборот агентлигининг маълум қилишича, ракета парчалари Хатай вилоятининг Дўртйол туманига тушган.
Туркия Миллий мудофаа вазирлиги маълумотига кўра, ракета Туркия томон йўналиш олган бўлиб, Сурия ва Ироқ ҳудудлари устидан учиб ўтганидан кейин йўқ қилинган. Ҳодиса натижасида жабрланганлар йўқ.
Шу билан бирга, Эрон ҳарбийлари Туркия томон ракета учирилганини рад этди. Бу ҳақда Reuters агентлиги Эрон давлат оммавий ахборот воситаларига таяниб хабар қилди.
Эрон расмийлари баёнотида мамлакат Туркия суверенитетини ҳурмат қилиши ва унинг ҳудудига қарши ҳеч қандай ракета учирилмагани таъкидланган.