Хитой ҳукумати 2026 йил учун ЯИМ ўсиш суръатини 4,5% дан 5% гача бўлган оралиқда белгилади. CNN ва BBC News хабарига кўра, бу 1991 йилдан бери энг паст кўрсаткичдир.
Сўнгги уч йил давомида Хитой расмийлари иқтисодий ўсиш мақсадини «тахминан 5%» даражасида белгилаб келаётган эди. 2020 йилда эса пандемия сабабли мақсадли кўрсаткич умуман белгиланмаганди.
«Кўп йиллар давомида биз ташқи зарбалар ва чақириқлар ички қийинчиликлар ҳамда қатъий сиёсий қарорлар билан чирмашиб кетган бу қадар жиддий ва мураккаб вазиятга камдан кам дуч келгандик», — деди ХХР Давлат кенгаши бош вазири Ли Цян Бутунхитой халқ вакиллари кенгаши сессиясининг очилишида. У мамлакат иқтисодиёти ҳамон «чуқур илдиз отган таркибий муаммолар» шароитида қолаётганини тан олди, бироқ шу билан бирга, ўтган йил давомида «ҳайратланарли барқарорлик намойиш этганини» таъкидлади.
BBC News`нинг таъкидлашича, Пекин истеъмолнинг заифлиги, аҳоли сонининг камайиши ва кўчмас мулк бозоридаги инқироз каби ички муаммолар, шунингдек, АҚШ билан савдо таранглиги ҳамда Эрондаги уруш сабабли юзага келган энергетика инқирози каби ташқи беқарорликлар фонида ўз иқтисодиётини қайта қуришга интилмоқда.
Ли Цян Хитойнинг 2030 йилгача бўлган иқтисодий ривожланиш режаси инновациялар, юқори технологик тармоқлар, илмий тадқиқотларга инвестициялар киритишни ва уй хўжаликлари истеъмолини рағбатлантириш бўйича қўшимча саъй-ҳаракатларни ўз ичига олишини эълон қилди. Келгуси беш йил ичида ҳукумат Хитой Халқ Республикасининг саноат салоҳиятини кенгайтириш мақсадида илм-фан ва технология, транспорт ҳамда энергетика соҳаларида 100 дан ортиқ йирик лойиҳани амалга оширишни режалаштирмоқда.
1970-йиллар охирида бошланган иқтисодий ислоҳотлар қарийб учта ўнйиллик давомида Хитойнинг икки хонали сонлардаги ўсишини таъминлаб келди. 2010 йилда ХХР Японияни ортда қолдириб, дунёнинг иккинчи йирик иқтисодиётига айланди. Бироқ, CNN`нинг тушунтиришича, сўнгги ўн йил ичида ўсиш суръатлари секинлашди, иқтисодий вазият эса расмийларнинг пандемияга қарши курашдаги қатъий чоралари туфайли янада оғирлашди.
Хитой иқтисодий ўсишининг асосий ҳаракатлантирувчи кучлари бўлган уй-жой қурилиши, ишлаб чиқариш ва инфратузилмага киритилган инвестициялар ўтган йили пасайиш кўрсатди. Телеканалнинг қайд этишича, кўчмас мулк соҳасидаги инқироз бешинчи йилдирки давом этмоқда, бу эса иқтисодиётни секинлаштириб, истеъмолчиларнинг ишончини пасайтирмоқда.