2027 йилдан Ўзбекистондаги янги кўп квартирали уйларни қуриш лойиҳаларида замонавий электрон ичимлик суви ҳисоблагичларини ўрнатиш мажбурий этиб белгиланади. Бу Ўзбекистон президентининг 24 февралдаги фармонида кўзда тутилган.
Ҳужжатга мувофиқ, барча янги кўп қаватли уйларнинг йўлаклари ва хонадонларида амалдаги техник регламентларга мувофиқлик сертификатига эга бўлган сув ҳисоблагичлари ўрнатилиши шарт.
Чорани амалга ошириш учун Қурилиш ва уй-жой коммунал хўжалиги вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликлари, шунингдек, Иқтисодиёт ва молия вазирлиги масъул этиб белгиланди.
2026 йилги давлат дастурида 305 мингдан ортиқ сув ҳисоблагичларини ўрнатиш кўзда тутилган.
2025 йилнинг июль ойида Тошкентда турар жой биноларида ичимлик сувини ҳисобга олиш ва назорат қилишнинг «ақлли» жиҳозларини оммавий ўрнатиш бошланганди. «Тошкент шаҳар сув таъминоти» компаниясининг хабар беришича, лойиҳа Шайхонтоҳур туманидаги икки йиллик пилот лойиҳасидан сўнг амалга оширилди. Ўтган йили 50 мингта шундай ҳисоблагич ўрнатиш режалаштирилган бўлса, 2030 йилгача 670 мингта ўрнатиш кўзда тутилган.
Ўтган йилнинг май ойида «Технопарк» компанияси (улуши Тошкент шаҳри ҳокимлигига тегишли, бироқ корхонанинг ўзи бошқа хусусий компания бошқарувига берилган) AKFA BUILD компаниясининг Австриянинг Diehl Metering компанияси билан биргаликда Osten сув ҳисоблагичларини ишлаб чиқаришни бошлаганини маълум қилганди.
Шу билан бирга, «Эко Ном» ва «Новатор» маркали сув ҳисоблагичларининг сертификат муддати тугагани сабабли уларни ўрнатишга рухсат берилмаган. Бунда «Ўзсувтаъминот» компанияси илгари ўрнатилган ва пломбаланган ушбу маркадаги ҳисоблагичлардан фойдаланишда давом этиш мумкинлигини тушунтирган.
«Эко Ном» ва «Новатор» ҳисоблагичлари.
«Ақлли» сув ҳисоблагичларини ўрнатиш Франциянинг Suez компанияси билан ҳамкорликда амалга оширилаётган «Тошкент шаҳри ичимлик суви таъминоти ва оқова сув тизимини трансформация қилиш» лойиҳаси доирасида бажарилмоқда.
