Давлат меҳнат инспекцияси Enter Engineering Pte. Ltd. компанияси лойиҳаларида ва унга алоқадор корхоналарда банд бўлган 12 754 нафар ишчининг иш ҳақи бўйича қарздорлигини ундириб берди. Бу ҳақда Бандлик ва камбағалликни қисқартириш вазирлиги матбуот котиби Гулноза Алимова ўз Telegram каналида маълум қилди.
Унинг сўзларига кўра, ижтимоий тармоқларда компания ходимлари иш ҳақи ололмаётгани, вазирлик эса вазиятга гўёки муносабат билдирмаётгани ҳақида хабарлар тарқалган.
«2026 йил март ҳолатига кўра, Enter Engineering Pte. Ltd. компанияси ҳамда унинг тасарруфидаги корхоналар фаолияти юзасидан келиб тушган мурожаатлар асосида Давлат меҳнат инспекцияси томонидан тегишли текширув ва ўрганиш ишлари амалга оширилмоқда», — дейилади хабарда.
Вазирликнинг қайд этишича, жорий йилда меҳнат инспекцияси Тошкент шаҳри, Жиззах, Самарқанд, Бухоро, Навоий ва Қашқадарё вилоятларида жойлашган 11 та объектда қарздорликни ундириш бўйича чоралар кўрган.
Текширувлар Enter Engineering компаниясига алоқадор 34 та корхонани қамраб олди.
Натижада Enter Engineering компаниясидан 12 754 нафар ишчининг иш ҳақи ундирилди ва тўлаб берилди, деб маълум қилди Гулноза Алимова. Ундирилган қарздорлик миқдори очиқланмаган.
Унинг қўшимча қилишича, текширувлар давом этмоқда.
«Ходимларнинг меҳнат ҳуқуқларини ҳимоя қилиш учун қонунчиликда белгиланган тартибда тегишли чоралар кўрилмоқда», — дейилади хабарда.
Enter Engineering, Eriell ва Saneg (шунингдек, тадбиркор Бахтиёр Фозиловга алоқадор бўлган бошқа кўплаб компаниялар) ходимлари иш ҳақи бир неча ойлаб кечиктирилаётгани ҳақида мунтазам равишда хабар бериб келади. Интернетда иш ҳақи тўланишини талаб қилаётган ишчиларнинг фото ва видеолари бир неча бор тарқалган. 2024 йил июнь ойида Gazeta ходимларнинг бу каби кечикишлар ҳақидаги ҳикояларини эълон қилганди.