2026 йилда Ўзбекистонда 1,5 миллион нафар хотин-қизни даромад билан таъминлаш режалаштирилган бўлиб, улардан 400 минг нафари бизнесга жалб этилади. Ушбу мақсадлар учун 25 триллион сўмдан ортиқ маблағ йўналтирилади. Бу ҳақда Шавкат Мирзиёев Халқаро хотин-қизлар кунига бағишланган тантанали маросимда маълум қилди.
Бундан ташқари, 166 минг нафар аёл замонавий касблар ва тадбиркорликка, яна 100 минг нафари эса IT соҳасига ўқитилади.
Шу билан бирга, аёллар ўртасида уйда тадбиркорликни йўлга қўйиш учун «Даромадли аёл» дастурини амалга ошириш бошланади. Ушбу дастур шарофати билан етакчи тадбиркорлар кўмагида касаначилик, ҳунармандчилик, паррандачилик, асаларичилик ва томорқа хўжалиги йўналишларида 50 минг нафар аёлнинг бандлиги таъминланади.
«Ҳамроҳ» дастури доирасида хотин-қизларнинг 3000 та лойиҳасини амалга ошириш учун 1 триллион сўм миқдорида маблағ ажратилади.
Президентнинг сўзларига кўра, ўтган йили аёллар бандлигини ошириш ва уларни тадбиркорликка жалб этиш учун 23,5 триллион сўмлик кредитлар ажратилган бўлиб, натижада 425 минг нафардан ортиқ хотин-қиз иш билан таъминланган ва бизнес билан шуғуллана бошлаган.
Хусусан, Янгиариқ туманидан Наргиза Бекмуратова тўқимачилик соҳасида 300 нафар аёлнинг бандлигини таъминлаб, ўтган йили иккинчи фабрикасини очди ва яна 100 та янги иш ўрни яратди. 2025 йили Туркиянинг Анқара шаҳрида ўтказилган халқаро танловда у «Хотин-қизлар учун энг кўп иш ўрни яратган тадбиркор аёл» номинациясида ғолиб чиқди.
«Мен бундай серғайрат қизларимизни янги Ўзбекистон бунёдкорлари деб биламан. Уларни ҳар қанча қўллаб-қувватлашга тайёрман», — деди Ўзбекистон президенти.
