Украина Ташқи ишлар вазирлиги Венгрияга сафар қилишдан вақтинча тийилишни тавсия қилди.
Баёнотга кўра, Будапештда Украина фуқароларидан етти нафари ўғирлаб кетилгани ва давлат банкига тегишли мулк мусодара қилингани ҳақида хабарлар бор. Шу сабабли вазирлик Венгрия ҳудудида украин фуқаролари хавфсизлигини кафолатлаш қийин эканини билдирди.
Вазирлик, шунингдек, Украина фуқароларидан имкон қадар Венгрия орқали транзит сафарларни ҳам амалга оширмасликни, бошқа йўналишларни танлашни сўради.
Баёнотда украин ва европалик бизнес вакиллари ҳам огоҳлантирилиб, Венгрия ҳудудида мулкнинг мажбурий мусодара қилиниши хавфи мавжудлиги айтилди. Шунинг учун тадбиркорларга бу мамлакатда иш олиб боришда эҳтиёт чораларини ҳисобга олиш тавсия этилди.
Маълумот учун, Украина расмийлари Будапештни «Ощадбанк» давлат банкининг етти нафар ходимини қўлга олганликда айбламоқда. Банк баёнотига кўра, инкассация гуруҳи 5 март куни икки машинада валюта ташиб кетаётганда Венгрия ҳудудида тўхтатилган.
Маълум қилинишича, пул ташиш «Ощадбанк» ва «Райффайзен банк Австрия» ўртасидаги келишув доирасида амалга оширилган. GPS маълумотларига кўра, ушлаб қолинган машиналар Будапешт марказида, Венгрия куч ишлатар тузилмаларидан бири яқинида турибди.
Украина ташқи ишлар вазири Андрий Сибига Венгрия ҳукуматини «етти нафар Украина фуқаросини гаровга олганликда» айблади.
Киев расмий Будапештга дипломатик нота юбориб, ушланган фуқароларни ва уларнинг мол-мулкини зудлик билан озод қилишни талаб қилди. Шунингдек, Украина Европа Иттифоқига мурожаат қилиб, Венгрия ҳаракатларига ҳуқуқий баҳо беришни сўрашини маълум қилди.