Тошкентда Европа ва Ўзбекистон иқтисодий ҳамкорлик ассоциациясининг (EUROUZ) ҳар йилги анъанавий «Ўзбекистон иқтисодий шарҳи — 2026» номли флагман тадбири бўлиб ўтди.
Унда давлат органлари вакиллари, халқаро молия институтлари ва инвесторлар иштирок этиб, Ўзбекистоннинг иқтисодий кўрсаткичлари, инвестиция муҳити ҳамда мамлакатнинг келгуси йилга мўлжалланган ривожланиш истиқболларини муҳокама қилди.
2025 йилда Ўзбекистон ялпи ички маҳсулоти (ЯИМ) 7,7 фоизга ўсиб, мамлакат тарихида илк бор 147 миллиард доллардан ошди, деб хабар берди инвестициялар, саноат ва савдо вазири ўринбосари Акбар Алиев. Хорижий инвестициялар ҳажми 43 миллиард долларга етди, экспорт эса 34 миллиард долларни ташкил этди.
«Европа Иттифоқи Ўзбекистоннинг асосий стратегик шерикларидан бири бўлиб, у билан ҳамкорлик жадал ривожланишда давом этмоқда. Ўзаро савдо айланмаси қарийб икки бараварга кўпайиб, 2018 йилдаги 3,2 миллиард доллардан 2025 йилда 6,9 миллиард долларгача етди. Бу ўсишда Ўзбекистоннинг GSP+ тизимига қўшилиши муҳим омил бўлди, бу ўзбек маҳсулотларининг ЕИ бозорига чиқиш имкониятларини сезиларли даражада кенгайтирди», — деди вазир ўринбосари.
Унинг маълумотларига кўра, ҳозирда Ўзбекистонда Европа капитали иштирокидаги 1000 дан ортиқ компания фаолият юритмоқда. ЕИлик шериклар билан биргаликда мамлакатда қиймати 40 миллиард доллардан ортиқ бўлган инвестициявий портфель амалга оширилмоқда.
Акбар Алиев, шунингдек, шу ёзда бешинчи бор ўтказиладиган Тошкент инвестиция форумини эълон қилди. У 16−19 июль кунлари бўлиб ўтади.
«Биз Европа Иттифоқи билан стратегик шериклигимизни юқори баҳолаймиз ва сиёсий мулоқот, инвестициявий ҳамкорлик ҳамда ишбилармонлик алоқаларининг кенгайиши муносабатларимизни янада юқори босқичга кўтаришига ишонамиз», — деди у.
Тадбир доирасида EUROUZ ва Ўзбекистон президенти ҳузуридаги Хорижий инвесторлар кенгаши котибияти ўртасида ҳамкорлик тўғрисидаги меморандум имзоланди.
«Шериклигимиз Европа бизнес ҳамжамияти билан ўзаро алоқаларни мустаҳкамлайди, сиёсий мулоқотни енгиллаштиради ҳамда янги ташаббуслар ва инвестиция имкониятларини илгари суришга ёрдам беради. Биз барқарор инвестициялар, яшил энергетика, рақамли трансформация, молия секторини ривожлантириш ва инновацион тармоқларни қўллаб-қувватлаш каби соҳаларда ҳамкорлик учун катта салоҳиятни кўрмоқдамиз», — деди котибият раҳбари Азиз Ғафуров.
Европа компанияларининг Ўзбекистонга қизиқиши ортиб бормоқда, деб таъкидлади EUROUZ кенгаши раиси ва EDF Central Asia бош директори Пьер-Поль Антёниссенс.
«EUROUZ`га аъзо бўлиш учун келиб тушаётган талабгорлар сонининг портлаш даражасида ўсиб бораётгани биз учун яхши мезон бўлиб хизмат қилмоқда. Биз ҳатто сонга эмас, сифатга эътибор қаратган ҳолда иштирокчилар сонини чеклаш ҳақида ҳам ўйлаяпмиз. Ўзбекистоннинг яқин орада Жаҳон савдо ташкилотига аъзо бўлиши ушбу тенденцияни янада тезлаштирмоқда. Европа компаниялари ўзлари билан технологиялар, ноу-ҳау ва инвестициялар билан бир қаторда қадриятлар, этика ва комплаенс қоидаларини ҳам олиб кириши мумкин. Улар Ўзбекистон билан муносабатларни ўзаро ҳурмат ва ўзаро манфаатдорлик асосида ривожлантиришни истайди», — деб таъкидлади у.
Конференция давомида экспертлар мамлакатнинг макроиқтисодий кўрсаткичлари, шунингдек, инфратузилмани ривожлантириш, хусусий сектор ролини кучайтириш, рақамли трансформация ва молиявий тараққиёт масалаларини муҳокама қилди.
Тадбирни шарҳлар экан, EUROUZ кенгаши асосчиси Ойбек Шайхов шундай деди: «Биз ушбу ҳар йилги тадбирни охирги олти йил ичида бешинчи бор ўтказаётганимиздан мамнунмиз. Ўзбекистондаги энг йирик халқаро бизнес-ассоциация сифатида давлат муассасалари, халқаро молия ташкилотлари ва аъзоларимиз билан биргаликда глобал аудиторияга Ўзбекистон иқтисодий ривожланишининг ҳар томонлама ва сифатли шарҳини тақдим этиш имкониятига эга эканимиздан фахрланамиз».