АҚШ президенти Дональд Трамп «Катта еттилик» (G7) давлатлари раҳбарлари билан ўтказилган онлайн учрашувда Эрон «таслим бўлиш арафасида» эканини айтган. Бу ҳақда Axios нашри G7 давлатларининг уч нафар расмийсига таяниб хабар берди.
Манбаларга кўра, Трамп можаро натижасига оммавий чиқишларда ҳам, ёпиқ суҳбатларда ҳам бир хил ишонч билан қарайди. У учрашув давомида АҚШнинг «Эпик ғазаб» амалиёти натижалари билан мақтаниб, «ҳаммамизга таҳдид солган саратонни йўқ қилдим» деб айтган.
Бироқ Трамп шу билан бирга Теҳронда таслим бўлиш ҳақида қарор қабул қила оладиган раҳбарлар қолмаганини ҳам айтган.
«Ҳозир раҳбар кимлиги номаълум, шунинг учун таслим бўлишни эълон қиладиган одам ҳам йўқ», – деган Трамп, учрашувда иштирок этган расмийлар сўзларига кўра.
Трамп баёнотларидан 24 соат ўтиб, Эроннинг янги олий раҳбари Мужтабо Хоманаий давлат телевидениеси орқали биринчи бор мурожаат қилиб, урушни давом эттиришини маълум қилди.
У Эрон «шаҳидлари» учун қасос олишини ва урушда янги фронтлар очилишини айтган. Шунингдек, Теҳрон Ҳурмуз бўғози орқали босимни кучайтириш ниятида эканини билдирган.
G7 давлатлари раҳбарлари эса Трампни урушни тезроқ тугатишга чақирди. Улар Ҳурмуз бўғозидаги вазиятни тезда барқарорлаштириш зарурлигини таъкидлаган.
Трамп эса вазият яхшиланиб бораётганини ва тижорат кемалари тез орада бу ҳудудда ҳаракатни қайта бошлаши мумкинлигини айтган. Аммо кеча кечаси Ироқ соҳиллари яқинида камида икки нефть танкерига ҳужум қилинган.
Учрашувда Германия канцлери Фридрих Мерц, Буюк Британия бош вазири Кир Стармер ва Франция президенти Эммануэль Макрон Трампни урушдан Россия фойда кўришига йўл қўймасликка чақирган.
Шу куни Россия президентининг махсус вакили Кирилл Дмитриев Флоридада Трамп маслаҳатчилари Стив Уиткофф ва Жаред Кушнер билан жаҳон энергетика инқирози масаласини муҳокама қилган.
Кейинчалик АҚШ Молия вазирлиги Россия нефтига нисбатан санкцияларни бир ойга вақтинча юмшатиш ҳақида қарор қабул қилди. Бу чора транзитда бўлган нефть юкларига нисбатан қўлланиши ва жаҳон энергетика бозорини барқарорлаштириш мақсадини кўзлаши айтилган.