Вьетнамнинг Хошимин шаҳридан Истанбулга йўл олган Turkish Airlines авиакомпаниясининг TK163 рейси Самарқанд халқаро аэропортига фавқулодда қўнди. Бу ҳақда Uzbekistan Airports хабар берди.
Маълум қилинишича, Boeing 787 самолёти экипажи бортдаги йўловчилардан бирининг соғлиғи ёмонлашгани сабабли муқобил аэродромга қўнишга қарор қилган.
Самолёт Самарқандга Тошкент вақти билан соат 3:40 да қўнган. Франция фуқароси бўлган 67 ёшли йўловчига тезкор тиббий ёрдам кўрсатилган. Дастлабки маълумотларга кўра, унда юрак хуружи гумон қилинмоқда. Йўловчи ва унга ҳамроҳ бўлган икки киши қўшимча текширув ва даволаниш учун тиббиёт ходимларига топширилган.
Зарур амалиётлар бажарилгандан сўнг парвоз давом эттирилди. Маҳаллий вақт билан соат 5:11 да самолёт Истанбулга жўнаб кетган.
Аввалроқ Uzbekistan Airways`нинг HY707 рейси билан Тошкентдан Владивостокка учаётган Boeing 767−300 самолёти техник сабаблар туфайли Красноярскка фавқулодда қўнган эди.
