«Катта еттилик» (G7) давлатлари Яқин Шарқдаги вазият кескинлашганига қарамай, Россияга қарши жорий этилган нефть санкцияларини юмшатмасликка келишди. Бу ҳақда Франция президенти Эммануэль Макрон G7 давлат раҳбарларининг видеоконференцияси якунлари бўйича маълум қилди.
Учрашувда Яқин Шарқдаги можаро, хусусан АҚШ ва Исроилнинг Эронга қарши ҳарбий ҳаракатлари ортидан юзага келган иқтисодий оқибатлар муҳокама қилинган. Энг катта таъсирлардан бири Эрон томонидан Ҳурмуз бўғози орқали нефть ташишга тўсқинлик қилиниши бўлгани таъкидланган. Бу эса жаҳон бозорида нефть тақчиллиги ва нархларнинг кескин ошишига олиб келган.
Айрим Ғарб давлатларида ёқилғи танқислиги ва нархларнинг ошиши фонида Россия нефтига нисбатан санкцияларни қайта кўриб чиқиш таклифлари ҳам билдирилган.
Бироқ Макроннинг айтишича, G7 давлатлари бундай қадамга бормасликка қарор қилган.
«Бу вазият ҳеч қандай ҳолатда Россияга қарши амалдаги санкцияларни бекор қилишни оқламайди», – деди Франция президенти.
Видеоконференцияда Европа комиссияси раиси Урсула фон дер Ляйен ҳам иштирок этган. У мулоқотдан сўнг ижтимоий тармоқда баёнот бериб, Яқин Шарқдаги вазиятни «ташвишли» деб атаган.
Фон дер Ляйен таъкидлашича, Европа давлатлари жорий қилган Россия нефтига нарх чегараси бозорларни барқарорлаштириш ва Россия даромадларини чеклашга ёрдам беради.
«Ҳозир санкцияларни заифлаштириш вақти эмас», – деди у.
Шунингдек, у Халқаро энергетика агентлигининг (IEA) ташкилотга аъзо давлатлар стратегик захираларидан 400 миллион баррель нефть ажратиш қарорини ҳам қўллаб-қувватлаган.
G7 таркибига АҚШ, Буюк Британия, Германия, Франция, Италия, Канада ва Япония киради. АҚШ президенти Дональд Трамп ҳам видеоконференцияда иштирок этган.
Аввалроқ Трамп нефть нархларини тушириш учун айрим санкцияларни вақтинча юмшатиш эҳтимолини тилга олган эди.
Шунингдек, АҚШ молия вазири Скотт Бессент Вашингтон Ҳиндистонга денгиздаги танкерларда бўлган Россия нефтини 30 кун давомида сотиб олишга рухсат берганини билдирган. Бу чора вақтинчалик экани ва Россияга катта молиявий афзаллик бермаслиги таъкидланган.