14 март куни футбол бўйича Ўзбекистон аёллар миллий терма жамоаси Осиё кубогининг чорак финалида Жанубий Кореяга 6:0 ҳисобида мағлуб бўлди.
Терма жамоа чорак финалда ютқизганига қарамай, 2027 йилда Бразилияда бўлиб ўтадиган Жаҳон чемпионати йўлланмаси учун курашни давом эттиради.
Осиёга жами 6 та тўғридан-тўғри йўлланма берилгани сабабли (4 таси ярим финалларга чиққан жамоалар учун), чорак финалда мағлуб бўлган 4 та жамоа қолган 2 та йўлланма учун ўзаро мини-турнирда иштирок этади.
Агар терма жамоа ушбу плей-офф босқичидаги учрашувларда ғалаба қозонса, Осиёнинг 5 ёки 6-жамоаси сифатида Бразилиядаги Жаҳон чемпионатига йўл олади. Плей-оффда 7- ва 8-ўринни эгаллаган жамоалар қитъалараро плей-оффга йўл олиб, у ерда бошқа қитъа вакиллари билан охирги имконият учун курашади.
Халқаро плей-офф турнирида бутун дунёдан (турли қитъалардан) жами 10 та жамоа иштирок этади. Улар Жаҳон чемпионатининг сўнгги 3 та йўлланмаси учун 3 та гуруҳга бўлиниб курашадилар.
Осиё кубоги ярим финалига Жанубий Кореядан ташқари, Хитой ва Австралия чиқди. Сўнгги ярим финалчи Япония ва Филиппин ўртасидаги баҳсда аниқланади.
Ўзбекистон 2 та йўлланма учун ўтадиган мини-турнирда КХДР, Хитой Тайпейи ёки сўнгги чорак финал мағлуби билан куч синашиши мумкин.
Эслатиб ўтамиз, гуруҳ босқичида Ўзбекистонлик футболчи аёллар B гуруҳида учта ўйин ўтказган. Биринчи турда жамоа КХДРга 0:3 ҳисобида имкониятни бой берган бўлса (видео), иккинчи турда Осиёнинг амалдаги чемпиони Хитойга 0:3 ҳисобида мағлуб бўлишганди (видео). Охирги турда эса Бангладешни 4:0 ҳисобида мағлуб этиб, энг яхши 3-ўринлар билан бирга чорак финалга чиққанди.
Фото
