Ўзбекистон ва Қозоғистонда суратга олинган «Амир Темур» тарихий фильмининг премьераси 2 апрель куни бўлиб ўтади. Бу ҳақда лойиҳа ижодкорлари хабар берди.
Филмда XIV аср ўрталарида Мўғуллар империяси қулаганидан сўнг, Буюк Ипак йўли минтақаси сиёсий беқарорликка тушиб қолган даврлар тасвирланган. Сюжет марказида шахсий йўқотишлар ва оғир жароҳатдан сўнг ҳокимият учун кураш бошлаб, рақибларига қарши турган ва ўз мавқеини тиклаган ёш Темур образи туради.
Лойиҳа 16+ ёш чегарасига эга тарихий ҳарбий эпос сифатида тақдим этилмоқда. Фильм Mystery Box халқаро продакшн компанияси томонидан суратга олинган.
Бош ролни актёр Кристиан Мортенсен ижро этган, у шунингдек лойиҳа продюсери бўлиб ишлаган. Актёр Лондон саҳналаридаги Шекспирнинг «Кориолан» ва «Генрих V» спектаклларидаги роллари, шунингдек, «Medal of Honor: Warfighter» глобал лойиҳасидаги бош роли билан танилган. У барча трюкларни мустақил равишда ўзи бажарган.
Амир Темурнинг рафиқаси Ўлжай ролини таниқли ўзбек актрисаси Юлдуз Ражабова ижро этган. Фильмда, шунингдек, «Ведьмак» сериалидаги Вильгефорц ва «Марко Поло»даги Аҳмад роллари орқали машҳур бўлган Махеш Жаду (у Амир Ҳусайн ролини ижро этган) ҳамда Амир Ҳусайннинг рафиқаси Сарой Мулк хоним ролида мўғул актрисаси Дулгуун Одху суратга тушган.
Иккинчи даражали ролларда Марказий Осиё давлатларидан келган актёрлар, жумладан Жандос Айбасов, Еркебулан Дайыров ва Санжар Мади иштирок этган.
Фильм режиссёри — бунгача «Iron Cowboy» ва «The Chosen» сериали устида ишлаган Жейкоб Шварц. Ижроия продюсер ва сценарий ҳаммуаллифи сифатида «Kinoscopia Production» компанияси асосчиси, тадбиркор Беҳруз Ҳамзаев иштирок этган.
Трюклар саҳналаштирилиши билан «Мулан», «Марко Поло» ва «The Expendables 2» каби фильмларни яратишда қатнашган «Nomad Stunts» жамоаси шуғулланган.
Матбуот хабарига кўра, фильмни намойиш этиш ҳуқуқи аллақачон 120 дан ортиқ мамлакат ва минтақаларга сотилган. Улар қаторида МДҲ давлатлари (Ўзбекистон, Қозоғистон, Россия, Қирғизистон, Тожикистон, Беларус), Яқин Шарқ (БАА, Саудия Арабистони, Қатар, Миср ва бошқалар), Европа (Франция, Испания, Германия, Туркия), Осиё (Япония, Хитой, Ҳиндистон, Жанубий Корея, Мўғулистон), шунингдек, Лотин Америкаси ва Африка мамлакатлари бор.
Фильм ижодкорлари таъкидлаганидек, ушбу картина «кино маданиятига улкан таъсир кўрсатган „Гладиатор“, „Шерюрак“, „Сўнгги самурай“, „Қирол нутқи“ каби тарихий эпосларнинг буюк анъаналарини давом эттиради».