16 март соат 16:30 да Тошкент шаҳри ФВБга Мирзо Улуғбек тумани Лашкарбеги маҳалласи Ҳамид Олимжон кўчасида жойлашган кўп қаватли уйларнинг бирида ёнғин чиққани ҳақида хабар келиб тушди. Бу ҳақда ФВВ матбуот хизмати маълум қилди.
Қутқарув гуруҳлари воқеа жойига соат 16:38 да етиб борган, ёнғин 16:52 да қуршаб олиниб, соат 16:59 да ўчирилган.
ФВВ маълумотларига кўра, ҳодиса оқибатида ҳеч ким жабрланмаган.
Ҳозирда ёнғин сабаби ва етказилган зарар миқдори аниқланмоқда. Воқеа жойида бўлган Gazeta мухбири иккита ўт ўчириш ва иккита тез ёрдам машинасини кўрган — тез ёрдам хизматига эҳтиёж туғилмаган.
Воқеа жойида муҳокама қилинаётган ёнғин сабабларига оид асосий тахминлар — ойналаш учун каркас ўрнатиш пайтидаги пайвандлаш ишлари ёки хонадон ичидаги ёнғин бўлиши мумкин.
Таъкидлаш жоизки, Ҳамид Олимжон майдонидаги 18 қаватли уйларда («Москва» уйлари деб юритиладиган) 2025 йил октябрь ойидан буён биноларни шишабанд кўринишида реконструкция ишлари олиб борилмоқда. Аҳоли аввалроқ бу ишларга ўз норозилигини билдирган эди: улар биноларнинг оғирлашиши хавфсизликка салбий таъсир қилишидан хавотирда. Ҳокимият эса бунга жавобан лойиҳа тўлиқ келишилганини ва қўшимча юк сезиларли бўлмаслигини таъкидлаган.
Аҳоли судга мурожаат қилган, бироқ Gazeta`нинг декабрь ойидаги хабарига кўра, уларнинг даъвоси рад этилган. Суд бу ишларни фасадни таъмирлаш тоифасига киритган ва реконструкция учун алоҳида рухсатнома талаб этилмаслигини белгилаган. Аҳоли бундай қарор лойиҳа ҳужжатларисиз қурилиш ишларини легаллаштириш учун прецедент (ўрнак) бўлиб қолишидан хавотир билдирган.
Фото
Ўнг томонда ўтган йилнинг кузида бошланган ойналаш ишлари кўриниб турибди.
Ёнғиндан зарар кўрган томонда осилиб турган арқонларни кўриш мумкин.
Фотода, шунингдек, ёнғиндан зарар кўрган томонда горизонтал арқонлар ўрнатилганини кўриш мумкин — эҳтимол, ойналаш ишлари учун.
