JAC Motors Tashkent автомобиль заводини 2026 йилда ишга тушириш режалаштирилмоқда. Бу ҳақда бош вазир ўринбосари Жамшид Ходжаев бошчилигидаги ҳукумат комиссиясининг «Янги авлод» саноат зонасига ташрифи давомида маълум бўлди.
Қиймати 135 миллион доллар бўлган лойиҳа йилига 30 мингта автомобиль ишлаб чиқариш қувватига эга корхона ташкил этишни кўзда тутади. Жойида тақдим этилган маълумотларга кўра, маҳсулотнинг кутилаётган экспорт ҳажми тахминан 5 миллион долларни ташкил этиши мумкин.
30,86 гектар майдонда жойлашадиган заводда ички ёнув двигателли автомобиллар, гибридлар ва электромобиллар ишлаб чиқариш режалаштирилмоқда.
Ишлаб чиқариш мажмуасининг биринчи босқичи қурилиши учун 97,1 миллиард сўм (тахминан 8 миллион доллар) ажратиш кўзда тутилган.
JAC Motors (Anhui Jianghuai Automobile Group) — 1964 йилда ташкил этилган, қароргоҳи Аньхой провинциясининг Хэфэй шаҳрида жойлашган Хитой давлат автомобилсозлик компаниясидир. Компания енгил автомобиллар, юклар ташувчи машиналар, автобуслар, тижорат транспорти ва электромобиллар ишлаб чиқаради. Дастлаб JAC тижорат техникасига ихтисослашган эди, бироқ кейинчалик седанлар, кроссоверлар ва электромобиллар чиқаришни бошлаб, ўз моделлар қаторини кенгайтирди. Бренд автомобиллари 100 дан ортиқ мамлакатга экспорт қилинади, жаҳон бозоридаги умумий етказиб бериш ҳажми эса 10 миллион донадан ошган.
Бошқа лойиҳалар
Ташриф давомида комиссия аъзолари қатор инвестиция лойиҳалари амалга оширилаётган «Янги авлод» махсус саноат зонасининг ривожланиши билан ҳам танишди. Зона лойиҳаларига киритиладиган умумий инвестициялар ҳажми 835 миллион долларга баҳоланмоқда, яратиладиган иш ўринлари сони эса тахминан 9000 тани ташкил этади.
Муҳим вазифалар қаторида ҳудуд орқали ўтувчи юқори босимли газ қувури ва 110 кВ кучланишли электр узатиш тармоқларини кўчириш ишларини тезлаштириш, шунингдек, ишлаб чиқаришларни ишга тушириш учун зарур бўлган ташқи муҳандислик-коммуникация тармоқларига уланиш билан боғлиқ масалаларни ҳал этиш белгиланди.
Комиссия JAC лойиҳасидан ташқари бошқа инвестициявий ташаббусларни ҳам кўриб чиқди. Хусусан, қиймати 288 миллион доллар бўлган DPW Tashkent лойиҳаси тақдим этилди. Ушбу лойиҳа 157 мингта контейнерни қайта ишлаш қувватига эга мультимодал логистика терминалини ҳамда 60 минг квадрат метрли «А» тоифали автоматлаштирилган омборларни ташкил этишни кўзда тутади.
Шунингдек, бир марталик тиббиёт буюмлари ишлаб чиқариш бўйича қиймати 50 миллион долларли Health Line МЧЖ ҚК лойиҳаси тақдим этилди. Корхонани йилига 1,4 миллиард дона маҳсулот ишлаб чиқариш қуввати ва 520 та иш ўрни билан ташкил этиш режалаштириляпти.
Бундан ташқари, комиссия индустриал технопаркда қиймати 25 миллион доллар бўлган оловбардош маҳсулотлар ишлаб чиқарувчи Ogneupor корхонаси ҳамда Comfi қандолат маҳсулотларини ишлаб чиқариш бўйича Accord Vision лойиҳаси билан танишди.
Ташриф якунларига кўра, қатор лойиҳалар бўйича газ ва электр таъминоти, кредит кўмаги ҳамда компенсация тўловларини босқичма-босқич тартибга солишга оид топшириқлар берилди.