Тошкент — Ангрен — Қамчиқ довони йўналишида 171 км узунликдаги муқобил пулли автомобиль йўлини 3,66 млрд долларга қуриш режалаштирилмоқда. Бу ҳақда «Ўзбекистон 24» телеканалига берган интервьюсида Транспорт вазирлиги ҳузуридаги Автомобиль йўллари қўмитаси «Автойўлинвест» агентлиги директор ўринбосари Аслиддин Исаев маълум қилди.
Унинг сўзларига кўра, лойиҳа мамлакатнинг энг йирик стратегик инфратузилма лойиҳаларидан бири ҳисобланади. Унинг узунлиги 314 километрни ташкил этади.
Биринчи босқичда Қамчиқ довони орқали ўтувчи 171 кмлик Тошкент — Ангрен йўлини қуриш режалаштирилмоқда. Унинг 33 км қисми Қамчиқдаги янги туннеллардан иборат бўлади.
Агентлик вакилининг айтишича, бу туннель минтақадаги энг йирик туннеллардан бири бўлиши мумкин.
«Мазкур туннель Марказий Осиёдаги энг йирик туннеллардан бири ҳисобланади. Тўрт полосали бўлади. 1Б категория бизларда 120 тезликда, 100−120. 120−150 км/соат тезликка мўлжаллаб лойиҳалаштирилган», — деди у.
Янги автомагистраль қуриб битказилгандан кейин пойтахт билан Фарғона водийси ўртасидаги сафар вақти сезиларли қисқаради.
«Бугунги кунда ҳаракат вақти 5−5,5 соатни ташкил этса, автомобиль йўли қурилиши натижасида 2−2,5 соатгача қисқаради», — деди Исаев.
Исаевнинг маълум қилишича, лойиҳа Жаҳон банки кўмагида амалга оширилмоқда. Лойиҳалаштириш ва тендер жараёнларини ўтказиш учун Arup халқаро консалтинг компанияси жалб қилинган.
«Тендер жараёнлари якунига етказилмоқда. Жорий йилда амалий ишлар бошланиши режалаштирилган», — деди «Автойўлинвест» вакили.
Лойиҳага Франция, Туркия ва Хитойнинг йирик инвестиция компаниялари ҳам қизиқиш билдирмоқда.
Янги трассани қуришдан асосий мақсадлардан бири — йўл ҳаракати хавфсизлигини ошириш.
«Лойиҳанинг асосий мақсади ҳаракат хавфсизлигини яхшилашга қаратилган. Ноқулай об-ҳаво шароитларида — ёмғир, қор шароитларида ҳам автомобиль йўли тўлиқ фойдаланишга тайёр ҳолатда бўлади», — деди Исаев.
Тақдим этилган маълумотга кўра, Тошкент — Ангрен — Қамчиқ йўналишидаги муқобил автомагистраль қурилиши 3,66 млрд долларга баҳоланмоқда (аввалроқ у 2023 йил нархларида 4,28 млрд доллар деб баҳоланган, кейинчалик лойиҳа оптималлаштирилган.
Пулли йўлда йиғимлардан тушадиган йиллик даромад 465 млн доллар атрофида бўлиши кутилмоқда. Бу эса лойиҳани тахминан 8 йил ичида қоплаш имконини бериши мумкин.
Транспорт вазири ўринбосари Жасурбек Чориев Тошкент-Андижон пулли автомобиль йўли қурилиши вақти 6 йил 3 ойни ташкил этишини маълум қилганди. Йўлнинг 64 фоизи янги қурилиши, 36 фоизи эса реконструкция қилиниши айтилганди. Узунлиги314 километр бўлган I-a категориясидаги йўл 6 қатордан иборат бўлади, деганди у.
Чориев 2025 йил июнида Gazeta`га лойиҳа уч босқичдан иборат бўлишини маълум қилганди: биринчи босқичда узунлиги 78 км бўлган Тошкент-Ангрен участкаси, иккинчи босқичда Ангрен-Поп (93 км), учинчи босқичда эса Поп-Андижон участкаси (143 км) қурилади.
Йўлнинг Ангрен ва Поп тумани ўртасидаги қисми рельеф бўйича энг қийин ҳисобланади. Чориев лойиҳа давлат-хусусий шериклик (ДХШ) форматида амалга оширилаётгани, бу эса анъанавий шартномаларга қараганда қимматроқ эканини таъкидлади.
Gazeta Сергелидаги Тошкент ҳалқа йўлидан бошланадиган Тошкент-Самарқанд янги пулли йўли ҳақида ҳам ёзганди. Ҳукумат йўлни аввало Тошкент-Сирдарё участкасидан, босқичма-босқич ишга тушириш имкониятини кўриб чиқмоқда. Тариф инвесторлар билан музокаралардан сўнг, аҳолининг молиявий имкониятлари ҳисобга олинган ҳолда белгиланади.