16 март куни ёнғин содир бўлган Ҳамид Олимжон майдонидаги 10А-сонли 19 қаватли уй аҳолиси Тошкент шаҳри ҳокимлигига ва шахсан ҳокимга мурожаат йўллади. Улар фасадларни ойнабанд қилиш ишларини тўхтатишни сўрамоқда. Аҳоли бу ишларга улар бошланган илк кунларданоқ қаршилик билдириб келмоқда (Gazeta вазият ҳақида ёзганди — аҳоли судга даъво киритган, бироқ суд ишларни вақтинча тўхтатиш ҳақидаги илтимосни рад этган).
Видео
Нима бўлди?
Мустақиллик кўчаси томондан ойнаванд фасадларнинг кўриниши.
Ёнғин 9-қаватда бошланган — бу ерда балкон ва хонадон ичидаги мол-мулкларга жиддий зарар етган. Олов, шунингдек, 10-қаватнинг балконига ҳам ўтган. У ерда кондиционер ва деразалар шикастланган, ташқи алюминий панеллар эса эгилиб қолган.
Аҳолининг сўзларига кўра, бошқарув компанияси директори ёнғин ҳақида хабар топгач, зудлик билан 9-қаватга шошилган. У ердаги хонадондан бир аёл аллақачон олиб чиқилганди. Олов кучайиб кетгани сабабли у ёнғинни ўчиришни бошлай олмаган.
Шундан сўнг эркак 10-қаватга кўтарилиб, у ердаги ёнғин жўмрагига уланган шланг ёрдамида ушбу хонадон ва пастки қаватдаги балконларга сув сепа бошлаган. Бу оловнинг юқори қаватларга тарқалишининг олдини олган бўлиши мумкин.
Фавқулодда вазиятлар вазирлиги хабарига кўра, ўт ўчирувчилар тахминан 8 дақиқада етиб келган. Аҳолининг айтишича, бу дақиқалар жуда узоқ давом этгандай туйилган. Ёнғинни ўчиришга 20 дақиқадан кўпроқ вақт сарфланган.
Уйнинг ёнғин бошланган томонига машинада яқинлашиш имкони бўлмагани сабабли олов ичкаридан ўчирилган.
Воқеа жойида иккита ўт ўчириш машинаси ва иккита тез ёрдам машинаси бўлган. Шифокорларнинг маълум қилишича, ҳеч кимдан мурожаат келиб тушмаган, улар ёнғин ҳақидаги хабар асосида ўзлари етиб келган.
«Ўзимизни хавфсиз ҳис қилмаяпмиз»
Ўт ўчирувчилар 9 ва 10-қаватларда ишлаётган лаҳза.
Расмий равишда ёнғин сабаблари ҳозирча очиқланмади. Фавқулодда вазиятлар бошқармаси вакилларининг воқеа жойида маълум қилишича, сабабни экспертиза аниқлайди. Бироқ, тахминлардан бирига кўра, ёнғинга уй фасадида олиб борилаётган пайвандлаш ишлари сабаб бўлган бўлиши мумкин. У ерда металл профиллар ўрнатилмоқда, уларга декоратив алюминий панеллар ва сурилувчи қора ойнали ромларни маҳкамлаш режалаштирилган.
Майдондаги тўртта 19 қаватли уйнинг ҳар бирининг бир томонида шундай ойналар мавжуд. Бу ерда ишлар якунлангач, Абдулла Қодирий кўчасининг нариги томонида симметрик тарзда жойлашган худди шундай тўртта баланд қаватли уйнинг фасадларида ҳам худди шундай ўзгаришлар бўлиши кутилмоқда.
Уйнинг фасадига ўрнатиш учун тайёрланган конструкциялар.
Видеомурожаатда аёллардан бири шундай дейди: «Ҳаммамиз қалтираяпмиз… Ўзимизни хавфсиз ҳис қилмаяпмиз. Худо хайрингизни берсин, бу реновацияни тўхтатинг».
Бошқа бир аёл — унинг хонадони 10-қаватда жойлашган ва ёнғиндан зарар кўрган — агар бу ҳодиса жазирама иссиқда содир бўлганида ёки уйнинг ташқи томони тўлиқ ойнабанд бўлганида нима бўларди, деб савол бермоқда.
Уйда кейинги кунгача лифтлар, шунингдек, ёнғин содир бўлган томондаги хонадонларда электр таъминоти ўчириб қўйилган. Бу эҳтиёт чораси шитга сув киргани сабабли кўрилган.
Подъездларга машинада яқинлашиш имкони йўқлиги — бутун Тошкентнинг муаммоси
Подъезд олдидаги автомобиллардан холи майдон. Аҳолининг таъкидлашича, одатда бу ер машиналар билан тўла бўлади.
Аҳоли, шунингдек, подъезд олдидаги майдон доим машиналар билан бандлигидан норозилик билдирди. Шу сабабли ўт ўчириш машиналари уйга яқин кела олмаган.
Бу — деярли барча турар жой бинолари ҳовлиларига хос бўлган жиддий муаммо бўлиб, кўпинча ҳовлиларда яқин атрофда фаолият юритадиган турли ташкилот ва компания ходимлари ҳам ўз автомобилларини қолдириб кетади.
Бироқ ҳозирги вақтда бирорта ҳам давлат органи ушбу муаммога эътибор қаратмаяпти.