Туркиянинг Истанбул шаҳри Бешиктош туманида жойлашган Исроил консуллиги биноси олдида қуролли отишма содир бўлди, деб хабар бермоқда Hürriyet газетаси.
Истанбул полицияси берган баёнотда айтилишича, уч киши «зарарсизлантирилган», улардан икки нафари «йўқ қилинган».
Газета маълумотларига кўра, уч киши консуллик жойлашган бинонинг еттинчи қаватига бостириб киришга уринган. Улардан икки нафарида узун стволли қурол бўлган. Кириш жойидаги қўриқчилар ва полиция ходимлари хавфни пайқаб қолган, натижада отишма келиб чиққан ва икки ҳужумчи отиб ўлдирилган. Учинчи ҳужумчи эса автомобиль орқасига яшириниб, полициячиларга қарата ўқ узишда давом этган, сўнгра яраланиб, қўлга олинган.
Истанбул губернатори Давут Гул ҳужумчилардан бири ўлдирилгани, қолган икки нафари эса яралангани ҳақида хабар бермоқда. Отишма давомида икки нафар полиция ходими ҳам жароҳат олган.
Туркия ички ишлар вазири Мустафа Чифтчи ҳужумчиларнинг шахси аниқланганини, улар Истанбулга Измитдан ижарага олинган автомобилда келганини маълум қилди. Чифтчининг сўзларига кўра, ҳужумчилардан бири «диндан ғаразли мақсадларда фойдаланувчи ташкилот» билан алоқадор бўлган, қолган икки нафари эса ака-ука бўлиб, улардан бирининг гиёҳванд моддалар билан боғлиқ суд иши борлиги аниқланган.
Адлия вазири Акин Гурлек Истанбул прокуратураси отишма юзасидан тергов бошлаганини билдирди.
Reuters нашрининг аниқлик киритишича, 2023 йилда Исроил ва ҲАМАС ўртасида уруш бошланганидан бери Туркия-Исроил дипломатик алоқаларида кузатилаётган кескин совуқлашиш сабабли икки ярим йилдан буён консулликда Исроилнинг бирорта ҳам дипломатик ходими ишлагани йўқ.
Яқин Шарқда янги уруш бошланиши билан Европа ва дунёнинг турли мамлакатларида Исроил билан боғлиқ объектларга ҳужумлар уюштирилмоқда. The Wall Street Journal ўз манбаларига таяниб ёзишича, Европада яҳудий мактаблари, синагогалар ва Исроилга алоқадор компанияларга қилинган қатор террорчилик ҳужумларида Эроннинг эҳтимолий иштироки тергов қилинмоқда. Газета маълумотларига кўра, март ойи бошидан буён Ғарбий Европанинг турли давлатларида яҳудий объектларига нисбатан йигирмага яқин ҳужум содир этилган ёки уларнинг олди олинган.