Жорий йилда Ўзбекистон ва АҚШ қўшма инвестиция платформасини ишга тушириш ниятида. Бу масала 5 апрель куни Вашингтонда Президент Администрацияси раҳбари Саида Мирзиёеванинг АҚШ Халқаро молиявий ривожланиш корпорацияси (ДФC) бош директори Бен Блек билан учрашувида муҳокама қилинди.
«Мулоқот давомида йирик лойиҳалар портфелини муҳокама қилдик. DFC Ўзбекистонга америкалик сармоядорларни жалб этишга кўмаклашади ҳамда инвестициявий хатарларнинг бир қисмини ўз зиммасига олади», — деб ёзди Америка-Ўзбекистон ишбилармонлик ва инвестиция кенгаши ҳамраиси Саида Мирзиёева ўзининг Telegram-каналида.
Ўзбекистон ва АҚШ ўртасида инвестиция платформасини яратиш тўғрисидаги битим президент Шавкат Мирзиёевнинг 18 февраль куни Вашингтонга амалий ташрифи чоғида имзоланган эди. Инвестиция платформасини ишга туширишдан мақсад — муҳим лойиҳаларни тизимли равишда амалга ошириш.
Шу куни Саида Мирзиёева АҚШ Давлат котиби Марко Рубио билан учрашди. Улар куни кеча бўлиб ўтган Ишбилармонлик ва инвестиция кенгаши йиғилиши якунларини муҳокама қилдилар ҳамда иқтисодий лойиҳалар портфели кенгайиб бораётганини таъкидладилар.
Ўзбекистон ПА раҳбари Марко Рубионинг икки давлат стратегик шериклигидаги «муҳим роли»га тўхталди.
У, шунингдек, АҚШ савдо вакили Жеймисон Грир билан «икки томонлама савдони ўзаро манфаатли тартибга солувчи» келишувларни муҳокама қилди.
