Термизда 9 апрель куни Жамоат саломатлиги соҳасидаги фавқулодда вазиятлар операцион маркази очилди, дея хабар қилди ЮНИСЕФнинг Ўзбекистондаги ваколатхонаси Gazeta’га.
Марказ минтақавий мувофиқлаштириш платформаси вазифасини бажаради. У фавқулодда вазиятларда реал вақт режимида ахборот алмашиш, тезкор режалаштириш ва идоралараро ҳамкорликни таъминлайди.
«Марказнинг миллий тизимларга интегратсиялашуви миллий устуворликларга мувофиқ жамоат саломатлигига таҳдидларга ўз вақтида, келишилган ва мувофиқлаштирилган жавоб беришни таъминлайди», — дейилади хабарда.
Марказ Ўзбекистон ҳукумати томонидан Санитария-эпидемиологик осойишталик ва жамоат саломатлиги қўмитаси номидан АҚШ ҳукумати билан ҳамкорликда ташкил этилган. Ижрочи ҳамкор ЮНИСЕФ бўлди.
Қўмита раиси Баҳодир Юсупалиевнинг таъкидлашича, марказ хавфларни эрта аниқлаш механизмларини мустаҳкамлайди ва бутун Ўзбекистон бўйлаб фавқулодда вазиятларга жавоб бериш тизимларини яхшилайди.
Марказ АҚШ ҳукуматининг Глобал соғлиқни сақлаш хавфсизлиги дастури доирасида очилган. Хабарда айтилишича, унинг яратилиши Халқаро тиббий-санитария қоидалари доирасида ўтказилган Қўшма ташқи баҳолаш тавсияларига мос келади.
Термиздаги марказ Нукусдаги худди шундай марказ билан ҳамкорликда фаолият юритиб, мувофиқлаштириш, маълумотлар алмашиш ва қарор қабул қилишни қўллаб-қувватлаш орқали минтақавий тайёргарликни кучайтиради. Шунингдек, у машғулотлар ўтказиш, мутахассисларни тайёрлаш ва тармоқлараро режалаштиришни ривожлантириш майдонига айланади.
Марказ юқумли касалликлар ва бошқа фавқулодда вазиятларга жавоб бериш вақтини қисқартириши, шунингдек, инқироз шароитида, айниқса, болалар ва аҳолининг заиф қатламлари учун асосий тиббий хизматларни узлуксиз кўрсатишни таъминлаши кутилмоқда.
«АҚШ ҳукумати 2021 йилдан буён Ўзбекистонда фавқулодда вазиятларни бошқариш тизимини ривожлантиришни қўллаб-қувватлаб келмоқда», — деди АҚШнинг Ўзбекистондаги элчиси Жонатан Хеник. Унинг сўзларига кўра, янги марказ касалликларни ўз вақтида аниқлаш ва олдини олишга ёрдам беради, уларнинг мамлакат ташқарисига тарқалиш хавфини камайтиради.
ЮНИСЕФнинг Ўзбекистондаги вакили Рехина Мария Кастижио тайёргарлик тизимларини мустаҳкамлаш инқироз шароитида болалар ва оилаларни ҳимоя қилишда муҳим роль ўйнашини ва асосий хизматларнинг узлуксизлигини таъминлашини таъкидлади.