ХХР раиси Си Цзиньпин 10 апрель куни Тайваннинг мухолифатдаги «Гоминьдан» партияси раҳбари Чжэн Ливэнь билан учрашувда Хитой Тайван мустақиллигига «мутлақо тоқат қилмаслигини» маълум қилди, деб ёзмоқда Reuters.
Бу Си Цзиньпин ва «Гоминьдан» партияси етакчиси ўртасидаги сўнгги ўн йилликдаги илк алоқадир. Чжэн Ливэнь Пекиннинг Тайванга ҳарбий босими кучайган бир шароитда амалга оширилаётган ўз ташрифини «тинчлик йўлидаги саёҳат» деб атади.
«Бўғознинг ҳар икки томонидаги ватандошлар — барчаси хитойликлар, тинчлик, тараққиёт, алмашинув ва ҳамкорликни истайдиган ягона оила вакилларидир. Оилада тотувлик ҳукм сурса, ҳамма нарса гуллаб-яшнайди. Тайван мустақиллиги — Тайван бўғозида тинчликка рахна солувчи асосий омил, биз бунга мутлақо тоқат қилмаймиз ва маъқулламаймиз», — деди Си Цзиньпин.
Унинг қўшимча қилишича, «Гоминьдан» ва Хитой Коммунистик партияси «сиёсий ўзаро ишончни» мустаҳкамлаши ҳамда «бўғознинг ҳар икки томонидаги ватандошларни бирлаштириши» керак.
Бунга жавобан Чжэн Ливэнь «хитой цивилизациясининг қайта тикланиши — Тайван бўғозининг ҳар икки томонидаги халқларнинг умумий интилиши» эканини таъкидлади. Унинг сўзларига кўра, бу «бутун дунёдаги тинчлик ва инсоният тараққиётига ижобий ҳисса» бўлади.
Шунингдек, Чжэн Ливэнь «1992 йил консенсуси»ни сақлаб қолиш — «урушдан қочиш, фожианинг олдини олиш, биргаликда ҳаракат қилиш ва тинчлик ўрнатиш» йўли эканини қайд этди.
«1992 йил консенсуси» — ўша пайтда ҳокимиятда бўлган «Гоминьдан» партияси ва Хитой Коммунистик партияси ўртасидаги «ягона Хитой» мавжудлиги тўғрисидаги келишув бўлиб, у турлича талқинлар учун жой қолдиради, деб ёзади BBC. Тайваннинг Демократик прогрессив партияси эса ушбу консенсус орол суверенитетига путур етказади деб ҳисоблаб, уни изчиллик билан рад этиб келади.
Хитой Тайван президенти Лай Циндэ билан музокаралар олиб боришни истамаяпти ва уни «сепаратист» деб атамоқда. Лай Циндэ маъмурияти, ўз навбатида, Пекин Тайбэйдаги демократик йўл билан сайланган ҳукумат билан мулоқот қилиши кераклигини билдирмоқда.