Россия президенти Владимир Путин Пасха байрами муносабати билан Украинадаги урушда сулҳ эълон қилди, деб хабар берди Кремль.
«Яқинлашиб келаётган православларнинг Пасха байрами (Масиҳнинг тирилиши) муносабати билан 2026 йил 11 апрель соат 16:00 дан 12 апрель куни якунига қадар сулҳ эълон қилинади», — дейилади хабарда.
Маълумотда қайд этилишича, Россия ҳарбийларига «ушбу даврда барча йўналишларда жанговар ҳаракатларни тўхтатиш бўйича кўрсатма берилган».
Аввалроқ Украина президенти Владимир Зеленский Пасха байрамида сулҳ эълон қилишни таклиф этган эди. Кремль баёнотига жавобан у Украина ўт очишни тўхтатишни қўллаб-қувватлашини маълум қилди.
«Украина бир неча бор икки томондан ташланадиган қадамларга тайёрлигини билдирган. Бу йил биз Пасха байрами вақтида ўт очишни тўхтатишни таклиф қилган эдик ва шунга мувофиқ ҳаракат қиламиз», — деб ёзди у ўзининг Telegram каналида.
«Одамларга таҳдидларсиз Пасха ва тинчлик сари ҳақиқий ҳаракат керак. Россияда Пасхадан кейин ҳам зарбалар беришга қайтмаслик учун имконият бор», — дея қўшимча қилди Зеленский.
Бу йил православ Пасхаси 12 апрель куни нишонланади.
