АҚШ президенти ташаббуси билан ташкил этилган ва у раҳбарлик қилаётган «Тинчлик кенгаши» Ғазо секторини қайта тиклаш учун ташкилотга аъзо мамлакатлар ваъда қилган 17 миллиард долларнинг озгина қисмини олди, холос, деб ёзмоқда Reuters ўз манбаларига таяниб.
«Тинчлик кенгаши»нинг илк йиғилиши 19 февраль куни Вашингтонда бўлиб ўтганди. Учрашувда Дональд Трамп тўққизта аъзо давлат, жумладан, Ўзбекистон Ғазога ёрдам бериш учун 7 миллиард доллардан ортиқ маблағ ажратишга ваъда берганини эълон қилган. Қўшма Штатлар эса ташкилотга 10 миллиард доллар йўналтириш мажбуриятини олган.
Халқаро ташкилотларнинг ҳисоб-китобларига кўра, икки йиллик уруш давомида ҳар бешта бинодан тўрттаси вайрон бўлган Ғазони қайта тиклаш тахминан 70 миллиард долларга тушади.
«Тинчлик кенгаши» режаси Фаластиннинг ҲАМАС гуруҳи қуролсизлантирилгани ва Исроил қўшинлари олиб чиқилганидан кейин Ғазони кенг кўламли қайта тиклашни назарда тутади. Маблағлар, шунингдек, Ғазони бошқариш бўйича Миллий мувофиқлаштирувчи қўмита (NCAG) фаолиятини молиялаштириш учун ҳам мўлжалланган эди — бу ҲАМАС ўрнига Ғазо устидан назоратни қўлга олиши керак бўлган, АҚШ томонидан қўллаб-қувватланадиган маъмурий органдир. Қўмита таркибига фаластинлик технократлар кирган. Унга Фаластин мухторияти вазирининг собиқ ўринбосари Али Шаат раҳбарлик қилмоқда.
Reuters манбаларидан бирининг хабар беришича, молиялаштиришни ваъда қилган 10 та давлатдан фақат учтаси — БАА, Марокаш ва АҚШ ўз ҳиссасини қўшган. Агентлик суҳбатдошининг сўзларига кўра, «Тинчлик кенгаши»нинг бюджети ҳозирда 1 миллиард доллардан камроқни ташкил этмоқда. АҚШ ва Исроилнинг Эрон билан уруши «ҳамма нарсага таъсир қилди», дея қўшимча қилди у.
«Тинчлик кенгаши» молиялаштириш билан боғлиқ муаммолар ҳақидаги маълумотларни рад этди.
«„Тинчлик кенгаши“ самарали, аниқ вазифаларни бажаришга йўналтирилган ташкилот бўлиб, маблағларни заруриятга қараб жалб қилади. Ҳеч қандай молиявий қийинчиликлар мавжуд эмас. Бугунги кунга қадар молиялаштириш бўйича барча сўровлар тўлиқ ҳажмда қаноатлантирилди», — дейилади ташкилот баёнотида.
«Тинчлик кенгаши» дастлаб 2025 йил октябрь ойида Дональд Трамп воситачилигида келишилган тинчлик режаси доирасида Ғазо секторини бошқариш бўйича халқаро орган сифатида ўйланган эди. Кейинчалик кенгаш кенгроқ ваколатларга эга бўлди ва эндиликда бутун дунёдаги можароларни ҳал қилиш билан шуғулланади. Ўзбекистон ушбу ташкилотга 2026 йил январь ойида Швейцариянинг Давос шаҳрида таъсисчи давлат сифатида қўшилган.