Ўзбекистонлик шахматчи Жавоҳир Синдаров 11 апрель куни 2026 йилги Номзодлар турнирининг 11-турида америкалик гроссмейстер Фабиано Каруана билан қора доналарда ўйнаб, дуранг қайд этди.
Партия кескин ва узоқ давом этди. Ўйин ўрталарида Синдаров юришларни такрорлаш орқали дурангга ишора қилди, бироқ Каруана ўйинни давом эттиришни маъқул кўрди. Якунда рақиблар анча вақт давомида эндшпиль ўйнади: ўзбекистонлик шахматчида тўра ва фил, америкаликда эса тўра ва от қолган эди.
Компьютер таҳлили вазият тенг эканини кўрсатганига қарамай, томонлар дурангга рози бўлгунларига қадар кураш яна анча вақт давом этди.
Таъкидлаш жоизки, биринчи даврада Синдаров Каруанани оқ доналарда ўйнаб мағлуб этганди.
Турнир жадвалидаги вазият учун Аниш Гири ва Андрей Есипенко ўртасидаги баҳс ҳам муҳим аҳамиятга эга эди, бу ўйин ҳам дуранг билан якунланди. Бунинг натижасида мусобақа тугашига уч тур қолганда Синдаровнинг яқин таъқибчиларидан ўзиб кетиш фарқи икки очко миқдорида сақланиб қолди.
Тур якунларига кўра, бошқа партиялар натижалари жадвалнинг юқори қисмида жиддий ўзгаришларга олиб келмади — етакчилар асосан муроса йўлини танлади, бу эса ўзбекистонлик гроссмейстернинг фойдасига хизмат қилди.
12 апрель куни бўлиб ўтадиган 12-турда Синдаров оқ доналарда Ҳикару Накамурага қарши баҳс олиб боради.
Эслатиб ўтамиз, аввалги турда Синдаров турнирдаги олтинчи ғалабасини қўлга киритиб, тарихга кирди — бу 2013 йилдан бери Номзодлар турнири учун рекорд натижа ҳисобланади. Ўша вақтда унинг ихтиёрида ҳали яна тўртта партия бор эди.
2026 йилги Номзодлар турнири 29 мартдан 15 апрелга қадар Кипрда бўлиб ўтмоқда ва унда сайёранинг саккиз нафар энг кучли гроссмейстери иштирок этмоқда. Иштирокчилар икки даврада (14 тур) ўзаро кураш олиб боради. Ғолиб амалдаги жаҳон чемпиони Доммаражу Гукеш билан шахмат тожи учун баҳслашиш ҳуқуқини қўлга киритади. Турнирнинг соврин жамғармаси 700 минг еврони ташкил этади.
Вақт назорати бўйича биринчи 40 та юриш учун икки соат берилади, шундан сўнг ўйин охиригача 30 дақиқа ва биринчи юришдан бошлаб ҳар бир юриш учун 30 сониядан вақт қўшиб борилади. 40-юришгача дурангга келишиш тақиқланган. Ғалаба учун 1 очко, дуранг учун 0,5 очко берилади.