Россия пасха сулҳини узайтирмайди, уруш давом этади.
Пасха сулҳи тугаганидан сўнг, Россия ўзининг «белгиланган мақсадларига эришилгунга қадар» Украинадаги урушни давом эттиради. Бу ҳақда Россия президенти матбуот котиби Дмитрий Песков журналист Павел Зарубин билан интервьюсида айтиб ўтди.
Песковнинг сўзларига кўра, Украина президенти Владимир Зеленский қарор қабул қилиши керак (Донецк вилоятидан қўшинларни олиб чиқиш назарда тутилмоқда). «Унгача… сулҳ тугаганидан кейин махсус ҳарбий операция давом этади», деди матбуот котиби.
Песков Россия «барқарор тинчлик»ни хоҳлаётганини ва бунга «бугун» тайёр эканлигини таъкидлади. Аммо тинчлик, деб қўшимча қилди у, фақат «биз ўз манфаатларимизни таъминлаганимизда» бошланиши мумкин.
Владимир Зеленский аввал сулҳ пасхадан кейин давом этиши мумкинлигини айтганди. Украина томони анчадан буён ўт очишни тўхтатишни таклиф этиб келади, аммо Москва бунга рози бўлмаяпти.