Қирғизистон ҳарбий прокуратураси Миллий хавфсизлик давлат қўмитаси (МХДҚ) раисининг собиқ ўринбосари Тимур Шабданбековни қўлга олди, деб хабар бермоқда Kaktus.media ҳуқуқ-тартибот идораларидаги манбаларига таяниб. У мансаб ваколатини суиистеъмол қилишда гумонланмоқда.
24.kg нашрининг аниқлик киритишича, ушбу иш бўйича Шабданбековдан ташқари МХДҚнинг яна бир неча собиқ ва амалдаги ходимлари тергов қилинмоқда.
Шунингдек, 13 апрель куни МХДҚ раҳбарининг яна бир собиқ ўринбосари Даниэль Рисалиев ҳам қўлга олинганди. У коррупция билан боғлиқ жиноятларда гумон қилинмоқда. Бишкек шаҳрининг Биринчи май тумани суди Рисалиевни уй қамоғига чиқариш ҳақида қарор қабул қилган.
Қирғизистон президенти Садир Жапаров Даниэль Рисалиевни 2026 йил 10 февралда, Тимур Шабданбековни эса 17 февралда лавозимидан озод этган. Бу истеъфолар МХДҚни 2020 йилдан бери бошқариб келган Қамчибек Ташиевнинг ишдан бўшатилиши ортидан юз берди. Жапаров Ташиевни лавозимидан четлатиш қарорини жамиятда бўлиниш келиб чиқишининг олдини олиш истаги билан изоҳлаган.
