АҚШ Марказий қўмондонлиги (CENTCOM) Форс ва Уммон қўлтиқларидаги барча Эрон портларини денгиз орқали қамал қилишни бошлади. Блокада Эрон портларига ва қирғоқбўйи ҳудудларига кирувчи барча давлатларнинг кемаларига тааллуқли бўлади.
«CENTCOM Ҳурмуз бўғози орқали Эронга тегишли бўлмаган портларга йўл олган ва у ердан қайтаётган кемаларнинг эркин ҳаракатланишига тўсқинлик қилмайди», — дейилади хабарномада.
АҚШ президенти Дональд Трамп ўтган дам олиш кунлари Покистонда АҚШ ва Эрон ўртасидаги музокаралар муваффақиятсиз якунланганидан сўнг Ҳурмуз бўғозини блокадалашини эълон қилганди. Вашингтон бошқа шартлар қатори Теҳрондан ядровий қурол ишлаб чиқишдан воз кечишни талаб қилган. Эрон эса АҚШнинг бу талабларини «ҳаддан ташқари юқори» деб атади.
Эрон қуролли кучлари вакили АҚШнинг халқаро кема қатновига қўйган чекловларини «қароқчилик» деб атади. У Эрон портларига хавф туғилган тақдирда, Форс ёки Уммон қўлтиғидаги бирорта ҳам порт «хавфсиз бўлмаслиги» билан таҳдид қилди. Бундан аввалроқ Эрон Ислом инқилоби қўриқчилари корпуси (ИИҚК) ҳар қандай ҳарбий кемаларнинг бўғоз орқали ўтишга уриниши ўт очишни тўхтатиш режимини бузишини ва бунга «қатъий ва шафқатсизларча чек қўйилишини» билдирганди.
Блокада расман бошланганидан кўп ўтмай, Дональд Трамп ўзининг Truth Social ижтимоий тармоғида Эрон ҳарбий-денгиз флоти «бутунлай йўқ қилингани», аммо уларда жанговар катерлар қолганини ёзди.
«Агар ушбу катерлардан бирортаси бизнинг қамал чизиғимизга яқинлашса, у денгиздаги гиёҳванд моддалар савдогарларининг қайиқларига қарши қўлланадиган тизим орқали зудлик билан йўқ қилинади. Тез ва шафқатсизларча», — деб баёнот берди Оқ уй раҳбари.
АҚШнинг НАТО бўйича иттифоқчилари, жумладан, Буюк Британия ва Франция, Эрон портлари қамалида иштирок этишдан бош тортди. Улар Ҳурмуз бўғозини очиш бўйича дипломатик ташаббус устида ишлаётганини маълум қилди.
8 апрелга ўтар кечаси АҚШ ва Эрон икки ҳафталик сулҳ тузишга келишиб олганди. Ушбу келишувнинг асосий шартларидан бири дунё нефтининг 15−20 фоизи ва суюлтирилган табиий газнинг 30 фоиздан ортиғи ўтадиган Ҳурмуз бўғозини қайта очиш бўлган. Эрон келишув кучга кирган биринчи кунда бир нечта кемани ўтказиб юборди, бироқ Исроилнинг Ливанга берган зарбаларидан сўнг бўғозни қайтадан блоклаб қўйди.