Туркия жануби-шарқидаги Шанлиурфа провинциясида лицейга қилинган қуролли ҳужум оқибатида камида 16 киши яраланди, деб хабар бермоқда турк ОАВ нашри.
Ҳодиса 14 апрель куни кундузи Сиверек туманидаги Аҳмет Коюнжу номидаги касб-ҳунар лицейида содир бўлган.
Hurriyet нашрининг қайд этишича, ҳужумчи лицей биносига ов милтиғи билан кириб, тартибсиз равишда ўт очган. Провинция губернатори Ҳасан Шилдакнинг маълум қилишича, жароҳатланганлар орасида 10 нафар ўқувчи, тўрт нафар ўқитувчи, бир полициячи ва бир ошхона ходими бор.
Губернаторнинг сўзларига кўра, ҳужумчи мазкур лицейнинг 2007 йилда туғилган собиқ ўқувчиси бўлган. Полиция уни зарарсизлантиришга уринган вақтда у ўз жонига қасд қилган.
Туркия Ички ишлар вазирлиги ҳодиса юзасидан тергов бошланганини маълум қилди.
