Маданий мерос агентлиги 14 апрель куни ўтказилган мониторинг якунларига кўра Тошкентдаги «Халқлар дўстлиги» саройи олдида ўрнатилган реклама баннерларини демонтаж қилишни буюрди. Бу ҳақда идора матбуот хизмати хабар берди.
Маданий мерос объектлари рўйхатига киритилган мазкур сарой Маданият вазирлиги тасарруфида ҳисобланади. Ўрганишлар асосан концертлар реклама қилинган баннерлар рухсатсиз ўрнатилганини кўрсатган.
Реклама тўғрисидаги қонунга кўра, моддий маданий мерос объектларида ташқи рекламани жойлаштириш тақиқланган, Маъмурий жавобгарлик тўғрисидаги кодекс эса бундай объектларга нисбатан ҳурматсизлик билан муносабатда бўлганлик учун жарима назарда тутади. Шунга қарамай, баннерлар бу ерда йиллар давомида жойлаштириб келинган.
Хабарда айтилишича, масъулларга нисбатан тегишли чоралар кўриш бўйича огоҳлантириш берилган.
Агентлик барча давлат идоралари ва тадбиркорларни «меросга бўлган ҳурматни сақлашга»га чақирди.
Агентлик эълон қилган суратга кўра, сарой биноси яқинида чипта сотиш нуқтаси — сариқ рангли кичик будка сақланиб қолган.
