Футбол бўйича 2026 йилги Жаҳон чемпионатига икки ойдан камроқ вақт қолди. 11 июндан 19 июлгача АҚШ, Мексика ва Канада майдонларида ўтадиган турнирда Ўзбекистон терма жамоаси ўз тарихида илк бор иштирок этади.
Мундиалда ўзбекистонлик футболчилар К гуруҳидаги рақиблари — Колумбия (17 июнь), Португалия (23 июнь) ва Конго Демократик Республикасига (27 июнь) қарши ўйнайди. Турнирнинг Ўзбекистон учун тарихий аҳамиятини ҳисобга олган ҳолда, кўплаб мухлислар Жаҳон чемпионати чипталарини қандай сотиб олиш мумкинлигига қизиқмоқда.
Gazeta миллий терма жамоани трибунадан туриб қўллаб-қувватлашни истаган мухлислар учун Ўзбекистон миллий терма жамоаси ўйинлари ва Жаҳон чемпионатининг бошқа ўйинларига расмий чипталарни қандай сотиб олиш бўйича батафсил йўриқнома тайёрлади.
Жаҳон чемпионатининг расмий чипталарини FIFA веб сайтидан қуйидаги манзил орқали сотиб олиш мумкин:
www.fifa.com/en/tournaments/mens/worldcup/canadamexicousa2026/tickets
Бунинг учун дастлаб FIFA сайтида аккаунт очиш лозим. Аккаунт очиш учун бош саҳифанинг юқори ўнг бурчагидаги профиль белгисини ва янги фойдаланувчини рўйхатдан ўтказиш учун «Sign Up» тугмасини босинг.
Кейинги қадам: фойдаланувчининг шахсий маълумотларини киритиш.
Исмингиз, жинсингиз, туғилган санангиз, ўз мамлакатингизни киритинг ва ўзингизга қулай бўлган интерфейс тилини танланг. Шунингдек, келгусида аккаунтингизга кириш учун FIFA ID сифатида хизмат қиладиган электрон почта манзилингизни ҳам киритишингиз керак бўлади. Кейин «Continue» тугмасини босинг.
Кейинги ойнада аккаунтингиз учун пароль яратишингиз керак бўлади.
Паролни яратганингиздан сўнг келишув шартларини ўқиб чиқишингиз ва қабул қилишингиз керак. Кейин «Create Account» тугмаси танланади.
Шундан сўнг платформа рўйхатдан ўтиш пайтида киритган электрон почта манзилингизга олти хонали тасдиқлаш кодини юборади.
Ушбу кодни киритгандан сўнг аккаунтингиз рўйхатдан ўтган ҳисобланади ва платформа сизни бош саҳифага йўналтиради.
У ерда сиз чипта сотиб олишнинг тўрт хил варианти борлигини кўрасиз. Биз «Last-Minute Sales» опсиясидан бошлашингизни тавсия қиламиз. Бу орқали сиз қатнашмоқчи бўлган ўйинларингиз учун FIFA’нинг расмий нархларида чипталар мавжуд ёки йўқлигини билиб оласиз.
Дунё бўйлаб чипта сотиб олаётган одамлар сони кўплиги сабабли тизим баъзан секин юкланиши ва сиздан кутиб туришингизни сўраши мумкин. Бу ўринда сиз экранда чиққан кодни киритишингиз ва кейинги ойнага ўтгунингизга қадар кутишингиз керак бўлади.
Шундан сўнг платформа сиздан маълумотларингизни тўлдиришингизни ва тўлиқ исмингизни рўйхатдан ўтказиш учун фамилиянгизни ҳам киритишингизни сўрайди.
Исмингиз ва фамилиянгиз, шунингдек, бошқа маълумотларингиз тўғри киритилгани ва хорижга чиқиш паспортингиздаги билан мос келишига ишонч ҳосил қилинг. Виза олиш учун ариза топширганингизда ва сўровингизни FIFA Pass тизими орқали тезкор кўриб чиқишни сўраганингизда чиптангиздаги маълумотлар паспортингиздаги маълумотларга мос келмаса, тизим аризангизни рад этиши мумкин.
Кейин тизим аккаунтизга қайта киришингиз учун электрон почтангизга яна тасдиқлаш кодини юборади.
Шундан сўнг манзилингиз ва телефон рақамингизни тақдим этишингиз, 18 ёшдан ошганингизни тасдиқлашингиз ва қўллаб-қувватлайдиган терма жамоангизни — Ўзбекистонни танлашингиз керак бўлади.
Ва ниҳоят, чипта сотиб олишни бошлашингиз мумкин! Очилган саҳифанинг пастки қисмига ўтинг ва «Buy ticket (s)» тугмасини босинг.
Бу саҳифада Жаҳон чемпионатининг барча ўйинлари рўйхати келтирилган бўлади. Сиз ўйинларни улар ўтказиладиган стадионлар ёки ўйнайдиган терма жамоалар кесимида қидиришингиз мумкин.
Биз Ўзбекистон миллий терма жамоаси ўйинига чипталар қидиряпмиз, шунинг учун бошқа жамоалар орасидан ўзимизникини танлаймиз.
Жамоа ёки стадионни танлагандан сўнг саҳифада танланган тоифадаги ўйинларнинг қисқартирилган рўйхати пайдо бўлади. Баъзи ўйинлар бўйича улар учун чипталар қолмаганини англатувчи «Not Available» ёзуви ёки чипталар кам қолганини англатувчи «Limited Availability» ёзуви турганини кўришингиз мумкин.
Агар ушбу платформада сиз томоша қилишни истаган ўйин учун чипталар қолмаган бўлса, бошқа фойдаланувчилар ўз чипталарини қайта сотадиган расмий FIFA бозорида чипталар мавжуд ёки йўқлигини текширишингиз мумкин. Бу ҳақда қўшимча маълумотлар қуйироқда келтирилган.
Хўш, келинг, 27 июнь куни Жоржия штатининг Атланта шаҳридаги «Мерседес-Бенц» стадионида бўлиб ўтадиган Конго ва Ўзбекистон ўртасидаги ўйинни танлаймиз. Шундан сўнг тизим барча мавжуд чипталарни тоифалар ва стадиондаги жойлашуви бўйича кўришингиз ҳамда ўриндиқни танлашингиз мумкин бўлган ойнани очади.
Қидирувни осонлаштириш учун чап томонда бюджетингизни кўрсатишингиз ва унга мос келадиган мавжуд чипталарни қидиришингиз мумкин.
Ўнг томонда сиз қандай чипта тоифалари мавжудлигини ва уларнинг нархини кўришингиз мумкин.
Материал эълон қилинган пайтда мавжуд чипталар нархи 140 доллардан 900 долларгача эди.
Шунингдек, стадион харитасидаги чипталар мавжудлиги ва тоифасини кўрсатувчи рангли жойлар устига курсорни олиб бориб, ушбу секторда нечта чипта мавжудлигини ва қандай нархда эканини текширишингиз мумкин.
Учрашувни қаерда томоша қилишни ҳал қилганингиздан сўнг ўша секторнинг устига босинг ва ўриндиқни танланг.
Чиптани танлаганингиздан сўнг у саҳифанинг ўнг бурчагида пайдо бўлади. «Add to cart» тугмасини босиш орқали харидингизни якунлаш учун чиптани саватчангизга қўшишингиз мумкин.
Шундан сўнг тизим сизни чипталарни текшириш жараёнига йўналтириши керак. Агар сиз иккита ёнма-ён бўш ўриндиқдан бирини танлаган бўлсангиз, платформа сизга бошқа ўриндиқни таклиф қилиши мумкин, чунки ёнма-ён ўриндиқлар биргаликда сотилиши мумкин. Бу вазиятда сиз таклиф қилинган ўриндиқни қабул қилишингиз («Accept Proposal») ёки бошқа вариантни танлашингиз мумкин («Modify»).
Кейин маълумотларингизни текшириш ва чиптангизни сотиб олиш учун саватчага ўтинг. Тўловни амалга ошириш учун «Buy now» тугмасини босинг.
Кейин платформа ўйин ва стадиондаги ўриндиғингиз бўйича барча маълумотларни, шунингдек, профилингизда кўрсатилган исм ва фамилияни ўз ичига олган кенгайтирилган чипта тафсилотларини кўрсатади.
Барча маълумотларингиз тўғрилигини, айниқса, исмингиз ва фамилиянгизнинг имлоси хорижга чиқиш паспортингиздагига мос келишини диққат билан текширинг.
Агар барча маълумотлар тўғри бўлса, саҳифанинг пастки қисмига ўтинг, келишув шартларини қабул қилинг ва тўловни амалга ошириш учун «Proceed to Payment» тугмасини босинг.
Ўзингиз фойдаланмоқчи бўлган халқаро тўлов тизимини танланг.
Кейин ўзингиздаги мавжуд Visa / Mastercard картаси маълумотларини киритинг ва «Pay Now» тугмасини босинг.
Тўлов амалга оширилгандан сўнг платформа тўловни тасдиқловчи хабарни электрон почтангизга жўнатади. Бу хабарга Жаҳон чемпионати ўйинига қандай бориш, аккаунтингиз орқали сотиб олган чипталарингизни қандай текшириш бўйича кўрсатмалар, шунингдек, инвойс ва чипта маълумотларини ўз ичига олган PDF файл бириктирилган бўлади.
Шунингдек, чипталарингизни FIFA веб сайтидаги шахсий аккаунтизнинг «My tickets» бўлимида текширишингиз мумкин.
Чипталарни FIFA расмий савдо майдончасидан сотиб олиш
Ўзингизга керакли чипталарни FIFA’нинг расмий маркетплейсида ҳам қидириб кўришингиз мумкин, бу ерда фойдаланувчилар ўзлари сотиб олган чипталарини қайта сотади. Бунинг учун асосий саҳифадаги «Marketplace» бўлимидан «Resell/Exchange Now»ни танлаш лозим.
2026 йилги Жаҳон чемпионатини белгилаб, «Buy» тугмасини босинг ва кейинги саҳифада ўйинини томоша қилмоқчи бўлган жамоангизни танланг.
Ўзингизга керакли ўйинни танлагандан сўнг жойни танлашингиз мумкин бўлган саҳифага ўтсангиз бўлади.
ФИФА маркетплейсида чипталар фойдаланувчиларнинг ўзлари томонидан сотилади, шунинг учун нархлар FIFA ўрнатган расмий нархларидан фарқ қилиши мумкин. Ушбу йўриқнома тайёрланаётган пайтда Ўзбекистоннинг барча ўйинлари учун қайта сотилаётган чипталар мавжуд эди. Уларнинг нархи — ўриндиқ тоифаси ва жойлашувига қараб 69 доллардан 10 350 долларгача.
Таъкидлаб ўтамиз, FIFA чипта нархидан 15 фоиз комиссия олади.