Ўзбекистонда 2030 йилгача маданият соҳасини ривожлантириш учун 1 триллион сўмдан ортиқ маблағ йўналтириш режалаштирилган. Бу ҳақда пайшанба куни президент Шавкат Мирзиёев ҳузурида маданият соҳасидаги янги лойиҳалар тақдимотида маълум қилинди, деб хабар қилди унинг матбуот хизмати.
Қуйидаги лойиҳалар ва масалалар муҳокама қилинди:
Самарқандда 9 гектар майдонда янги Ипак йўли музейи қурилиши. Лойиҳага кўра, унинг экспозицияси археологик материаллар, тасвирий ва амалий санъат асарларини ўз ичига олган 6000 дан ортиқ ноёб экспонатларни бирлаштиради. Шунингдек, музейда доимий ва вақтинчалик кўргазмалар учун жойлар, 160 ўринли аудитория, болалар академияси, консервация ва тадқиқот маркази, йирик фонд омборлари ташкил этилиши режалаштирилган.
Маданият муассасаларига аҳолини кенгроқ жалб этиш, уларнинг мазмуни ва иш шаклини замон талабларига мувофиқ янгилаш. Республикадаги 839 та маданият марказини босқичма-босқич трансформация қилиб, биноларига замонавий қиёфа бериш, хусусий секторни жалб қилиб, жозибадорлигини ошириш таклиф қилинди.
Санъат соҳасидаги иқтидорли ёшларни эрта аниқлаш, уларни бошланғич синфлардан мақсадли тайёрлаш, зарур бўлса, ўқиш жойида яшаш ва ижод қилиш учун муносиб шароитлар яратиш муҳим вазифа этиб белгиланди.
Президент Андижон ёшлар симфоник оркестри ва «Тумор» рақс ансамбли фаолиятини қўллаб-қувватлаш бўйича таклифларни маъқуллади.
Давлат раҳбари медиа маконда миллий контентни кенгайтириш, шунингдек, сунъий интеллект имкониятларидан оқилона фойдаланган ҳолда миллий маданият маълумотлар базасини изчил кўпайтириш зарурлигини таъкидлади.
Шунингдек, нодавлат маданият ташкилотларини ишга тушириш учун имтиёзли кредитлаш, нодавлат театрлар ва театр-студияларни давлат томонидан қўллаб-қувватлаш ҳамда уларга лойиҳаларни амалга ошириш учун грантлар ажратиш тизими жорий этилади.