17 апрель куни Эрон ташқи ишлар вазири Аббос Аракчи Ҳурмуз бўғози очилганини эълон қилди.
«Ливандаги ўт очишни тўхтатиш режими муносабати билан барча тижорат кемалари учун Ҳурмуз бўғози орқали ўтиш сулҳнинг қолган даври учун тўлиқ очиқ деб эълон қилинади», — деб ёзди у ўзининг Х ижтимоий тармоғидаги саҳифасида.
Унинг сўзларига кўра, кемалар «Эрон Ислом Республикаси Портлар ва денгиз транспорти ташкилоти томонидан аввалроқ эълон қилинган келишилган йўналиш бўйича» ҳаракатланишлари мумкин.
«Эрон ҳозиргина Ҳурмуз бўғози тўлиқ очилганини ва кемалар ўтиши учун тайёрлигини эълон қилди. Раҳмат!» — деб ёзди АҚШ президенти Дональд Трамп ўзининг Truth Social тармоғида.
Ўз навбатида, Brent нефти нархи бўғоз очилганидан кейин 90 долларгача пасайди.
Эрон уруш бошидан бери Ҳурмуз бўғозини амалда тўсиб қўйган эди. Ўт очишни тўхтатиш режими кучга кирганидан кейин Теҳрон бўғоз очилгани ҳақида эълон қилмаганди. Ўз навбатида, АҚШ Эрон портларидан чиқаётган кемаларга нисбатан ўз блокировкасини эълон қилган.
- 8 апрелга ўтар кечаси АҚШ ва Эрон икки ҳафталик сулҳ тузишга келишиб олганди. Ушбу келишувнинг асосий шартларидан бири дунё нефтининг 15−20 фоизи ва суюлтирилган табиий газнинг 30 фоиздан ортиғи ўтадиган Ҳурмуз бўғозини қайта очиш бўлган. Эрон келишув кучга кирган биринчи кунда бир нечта кемани ўтказиб юборган, бироқ Исроилнинг Ливанга берган зарбаларидан сўнг бўғозни қайтадан блоклаб қўйганди.
- Аввал хабар берганимиздек, АҚШ президенти Дональд Трамп АҚШ ва Эрон ўртасидаги навбатдаги учрашув шу дам олиш кунларида бўлиб ўтиши мумкинлигини айтган ва бу Эрон уруши якунига яқинлашаётгани борасидаги оптимизмни оширган.
