Жанубий Кореянинг Чинжу шаҳрида юк машинаси юк ташиш соҳасининг намойишга чиққан ходимларини босиб кетди, оқибатда бир киши ҳалок бўлди ва яна икки киши жароҳатланди, деб хабар бермоқда Yonhap агентлиги.
Полиция маълумотларига кўра, 2,5 тоннали юк машинаси CU озиқ-овқат дўконлари тармоғининг логистика маркази олдида митинг иштирокчилари устига юрган. Намойиш касаба уюшмаси вакиллари томонидан ташкил этилган бўлиб, улар CU оператори бўлган BGF Retail компанияси раҳбарияти билан музокаралар ўтказишни талаб қилган.
Полициянинг тахминига кўра, фожиа 40 ёшли ҳайдовчи унинг йўлини тўсиб қўйган намойишчиларни айланиб ўтмоқчи бўлган вақтида содир бўлган. Ҳайдовчи воқеа жойидаёқ соғлиққа ўта оғир шикаст етказиш айблови билан қўлга олинган. Ҳуқуқ-тартибот идоралари гумонланувчи ўз ҳаракатларини қасддан қилиб-қилмаганини аниқламоқда.
Yonhap хабарига кўра, ҳодиса оқибатида митингнинг 50 ёшли иштирокчиси юраги тўхтаган ҳолатда шифохонага етказилган ва ўша ерда вафот этган. Бошқа икки нафар жабрланувчи ўрта ва енгил даражадаги жароҳатлар олган, ҳозирда уларнинг аҳволи барқарор, деб аниқлик киритмоқда агентлик.
