Apple компанияси 2026 йил 1 сентябрдан унинг янги бош директори Жон Тернус бўлишини эълон қилди. Ҳозирда Тернус Apple’нинг аппарат таъминотини ишлаб чиқиш бўйича катта вице-президенти лавозимини эгаллаб турибди.
Охирги 15 йил давомида компанияни бошқариб келаётган Тим Кук ижрочи раис лавозимини эгаллайди.
«Кук ёз давомида бош директор вазифасини бажаришни давом эттиради ва ўтиш даври силлиқ кечишини таъминлаш учун Тернус билан яқиндан ҳамкорлик қилади. Ижрочи раис сифатида у компания фаолиятининг айрим жиҳатларида, жумладан, бутун дунё бўйлаб сиёсатчилар билан ҳамкорлик қилишда кўмак беради», — дейилади Apple хабарида.
Кук Apple’да бош директор сифатида ишлашни «ҳаётидаги энг катта шараф» деб атади.
«Мен Apple’ни бутун қалбим билан севаман ва мижозларимиз ҳаётини яхшилаш ҳамда дунёдаги энг яхши маҳсулот ва хизматларни яратишга интилишдан тўхтамайдиган ихтирочи, новатор, креатив ва чин дилдан ғамхўр инсонлар жамоаси билан ишлаш имконияти берилгани учун бениҳоя миннатдорман», — деб таъкидлади у.
Унинг сўзларига кўра, Тернус «муҳандис ақлига, новатор қалбига ҳамда ҳалоллик ва муносиб равишда раҳбарлик қилиш иштиёқига» эга. Бу айнан Apple’ни келажакка бошлай оладиган инсон, дея қўшимча қилди Кук.
«Деярли бутун фаолиятимни Apple’да ўтказиб, Стив Жобс раҳбарлигида ишлаш ва Тим Кукдек устозга эга бўлиш бахтига муяссар бўлдим. Дунё ва бир-биримиз билан мулоқотимизни тубдан ўзгартирган маҳсулотлар ҳамда фойдаланувчи тажрибасини шакллантиришда иштирок этиш мен учун катта шараф бўлди. Келгуси йилларда нималарга эришишимиз борасида катта оптимизмга эгаман», — деди Тернус.
- Тим Кук Apple компаниясида 1998 йилдан бери ишлаб келмоқда. У 2011 йил август ойида Стив Жобснинг ўрнини эгаллаб, компания раҳбарига айланган. Кук даврида Apple компанияси Apple Watch, AirPods ва Apple Vision Pro маҳсулотларини чиқарди, шунингдек, iCloud, Apple Pay, Apple TV ва Apple Music сервисларини ишга туширди. Унинг раҳбарлиги остида Apple’нинг бозор капитализацияси тахминан 350 миллиард доллардан 4 триллион доллардан кўпроққача ўсди.
